धिक्के खंदी रुकदी, चलदी
इस भीड़ै दे रेले बिचा
बाहर खड़ोइयै दिखदे जेल्लै
साधक अलबेले मस्ताने,
उ'नेंगी ल'बदी ऐ पगडंडी,
जीवन दे सौ रस्तें अंदर
बिजली दी इक लीकर जि'यां,
अम्बर अनगिन तारें बिच्चा
कपलां दे उस रस्ते आंगू
चुप-चपीती जा जो लंगी।
ए पगडंडी अत्त सुहानी,
ए पगडंडी डाहडी औखी,
आपमुहारे सदाबहारी फुल्लें-कलियें कन्ने सज्जी,
इस्से दे दौं पासें लमके
डडल न डूंगे।
नासमझी दी चंचलत्ताई इक पासै ऐ
पच्छोतावें दे परछामें दुए पासै।
इ'थै ओ पगडंडी,
जिस पर चलने खात्तर
मीरां ने पीता हा मौहरा,
केसरिया बलिदान हजारां गीत लिखी गे,
इ'थै ओ पगडंडी, जित्थें
सूरदास दे इकतारे दे बोल अजें बी सुनची जंदे।
इक-इक बोल हजारां लक्खां नैन जगांदा।
इ'थै ओ पगडंडी, जिस पर
कपलबस्तु दे सिद्धारथ नै
रूप हिरख, जोवन दे सुच्चे मोती बारे;
की जे-
इस पगडंडी दे गै अग्रें-
ओ सुखनें दा सुरग सुहामां
रसदा-बसदा,
मीरां दा गिरिधर ऐ जित्थें,
सूरदास दा शाम प्यारा !
गौतम दा निरबाणी अमरत,
मस्त-मलंगें मनसूरें दा अनहद सोऽहम्
काशी छोड़ी मगहर जाने आले
संत कबीरें दी पगडंडी,
जिस पगडंडी दी तांहगा इच
राजसिंहासन छोड़ी केई
राम-लखन बनवासी होई गे।
इस धारें पर आई खड़ोते दा जित्तो बी,
जोर-जबर दी छात्ती अंदर
बनी कटारी खु'ब्बी जंदा।
इस पगडंडी उप्पर शेर ओ डीडो मियां
इस धरती दी ईन-अजादी दी राखी लेई
काले स्वारथ नै टकराया।
इस्स्रै थाहरै पुज्जने खात्तर
सीस कटाइयै
दाता रणपत हा मुसकाया।
उस रत्तू दे रंगें लिखेआ सहाड़ा ओ इतिहास अमर ऐ !
सुच्ची प्रीतै दे मस्ताने दा ओ रस्ता,
बलिदानें दे गीत गूंजदे दिनें ते रातीं
इस धारें पर चलना औखा
चलै जे कोई
तां मीरां, मनसूर, सूर दी रीहगें अंदर गिनती ओदी ! ✧