बे-बसाही

पात्र-सूची

अमला - मुक्ख पात्र, इक जागरूक जुआन कुड़ी (२२-२४)
रमेश - अमला दा चचेरा भ्रा, अतिथि (२५-२८)
कंजरवेटर - रिटायर्ड फॉरेस्ट ऑफिसर, रेणु दे दादा (६५-७०)
प्रोफेसर - कॉलेज अध्यापक, रेणु दे ट्यूटर (४५-५०)
रेणु - कंजरवेटर दी पोतरी, छात्रा (२०-२१)
अपरणा - इक जुआन विधवा (३०-३५)
परदेसी - सफेद हवेली च रौहने आला साधक (३५-४०)

दृश्य १

रमेश: अमला, इस घरै च तेरा ए कमरा सच्चें गै सिरमौर ऐ।

अमला: [ हस्सियै ] सिरमौर ? के मतलब ?

रमेश: इत्थें हवा, रोशनी, धुप सब किझ ऐ।

अमला: ओह, ए कमरा डैडी ने बनवाया अपने आस्तै हा, पर कब्जा में करी लेआ। हून मिगी इत्थों कढ्ढने दे मनसूबे बनदे रौहन्दे न, पर में अजें हारी नेईं।

रमेश: तुगी इत्थों कढ्ढने दे मनसूबे की बना करदे न अमला ?

अमला: पैहलें ए पुच्छ जे में इस कमरे पर कब्जा कियां करी लैता हा?

रमेश: ठीक ए, गल्ती माफ। पैहले इ'थै इरशाद होऐ जे मेरी चचेरी भैनू ने चन्द्रमा आला लेखा ए इक राशी चा दूई राशी च प्रवेश कियां कीता ?

अमला: जोतस विद्या च अनधिकार प्रवेश करने आले मेरे भापा जी, ए गल्ल चन्द्रमा दे राशी बदलने कन्ने मेल इसी करी नेईं खन्दी की जे उस बचारे गी ए राशियां लगातार बदलनियां पौन्दियां न ते अमला गै हून इस कमरे चा कड्ढी लाना कोई सखल्ला नेईं।
[ दोए गड़ाका मारदे न ]

रमेश: जे चाचा जी मेरा मशवरा लैंगन तां इस कमरे चा अमला देवी गी कड्ढने दा उपाऽ बी, बिना कोई फीस लैते दस्सी देग ए रमेश बाबू।

अमला: उस उपाऽ गी क्या अउं बी जानी सकनी आं ?

रमेश: की नेईं। अमला देवी, केइयें गी धिक्के मारियै कड्ढना पौन्दा ऐ पर केईं, शहनाइयों दे मादक सुरें पर मस्त होइये आपूं गै कुसै कन्ने बिदा होई जन्द न। किश आया समझ?

अमला: आया की नेईं श्रीमान जी। पर उं'नें शहनाइयें दे बज्ने कोला पैहलें गै इस घरै च बे-बसाही दियां बे-सुरियां भाखां निकलन लग्गी पेइयां हियां। ख'ल्ल, में जिस कमरे च पढ़दी-सौंदी ही, ओ बल्लें बल्लें इक कैदखाना-जन सेही होन लगा हा। कमरे दे दोनें पासेआ औने-जाने दा रस्ता ऐ। घरै दे के ते आए-गे के, जो कोई लंगदा, कमरे च जरूर झांकियै दिक्खी।

...जन्दा जे इस संगीन कोठड़ी दा कैदी कुतै नस्सी ते नेईं गेआ। नस्सने आस्तै कुतै कोई सुरंग ते नेईं बना करदा ?

रमेश: में तेरी गल्ल नेईं समझी अमला।

अमला: गल्ल बे-बसाही दी ऐ रमेश। स्हाड़े घरें च जुआन कुड़ियें-जागतें, खास करियें कुड़ियें बारें बे-बसाही।

रमेश: संस्कारें दी गल्ल ऐ ना अमला।

अमला: में डैडी गी आखियै ए ट्रांजिस्टर लेआ हा। एदे पर गीतें-गानें दा कदै प्रोग्राम सुनन लगनी आं तां मिगी सेही होंदा ऐ जे मम्मी खिंझदियां न। इक दिन डैडी ते मम्मी दी इसै गल्लै पर बोल-चाल बी होई गेई। अ'ऊ गुसलखाने च ही, सब किज सुनै करदी ही। उ'नें दिनें गै ग्रां दा मेरी बुआ जी बी आई दियां हियां। विधवा न, पैसे आलियां न, पर बीते युगे दियां मूरत न, जि'न्दा अपना गै इक संसार ऐ। बड़ा दब-दबा हा उ'न्दा। ओ ध्याड़ी च इस 'समे गी अग्ग लगने' दी गल्ल कोई पंजाह बारी आखदियां हियां।

रमेश: समां ते बदलदा ऐ अमला पर मनक्ख बचारा ओदे कन्ने कन्ने कि'यां बदलै? अपने गै बचारें-संस्कारें दा कैदी ऐ जीब, ना समें दे बदलने गी रोकी सकदा ऐ, ना आपूं ओदे कन्ने कन्ने बदलदा ऐ- इस करी खिंझदा ऐ, धुखदा ऐ।

अमला: इ'थै ते मुश्कल ऐ जे दों-त्रै पिढ़ियें दे बक्खरे बक्खरे संस्कार रखने आले मनक्ख इक्कै थाहर किट्टे कि'यां रौहन?

रमेश: पर, इ'थै समझौता ते समाजी जीवनै दी नींव ऐ।

अमला: समझौता ते दोंनें पक्खें दियें भावनाएं दा आदर करियै गै होई सकदा ऐ ना रमेश। तूं हुन इन्ने चिरें इत्थै आया एं, हफ्ता-दस दिन रोहियै दिक्खी गै लैगा जे ए समझौता कि'यां निभदा ऐ।

रमेश: ना भई, में इत्थें ए नमें तजरबे ते नमें अनुभव करन नेईं आया। ख'ल्ल, उ'नें कमरे च जे तूं नेईं रही सकी तां देहाती खु'ल्ले जीवनै दा आदी में इन्ने दिन उत्थें कि'यां रही सकंग? तेरे इस घरै च इ'थै इक कमरा ऐ जित्थै आदमी रही सकदा ऐ, पर एदे पर ते तूं अधिकार करी बैठी दी एं।

अमला: पर में अपना ए अधिकार तेरे जनेह अतिथि कन्ने इन्नें दिनें आस्तै बंडी बी सकनी आं।

रमेश: मतलब? में इत्थें गै रमां? हे राम, तेरी मम्मी जां, तेरी ओ पैसे आली विधवा बुआ ऐ के कि'यां बरदाश्त करंगन जे दूरा-पारा दा रिशतेदार इक ग'बरू जागत तेरे कन्ने र'वै। [हसदा ऐ]

अमला: ओ बुआ बचारी ते, पिछले बरै सौ सुखनां-मिन्नतां करियै बैकुंठधाम गी चली गेइयां हियां।

रमेश: बुआ भाएं बैकुंठधाम चली जा पर ओदी ओ बे-बसाही च रंगोई दी नजर, ओदा ओ गुप्तचर मन ओदी ओ थाहरें थाहरें अग्गी दे लोरे भड़कदे दिक्खने आली सोच ...........ओ थोड़े ओदे कन्ने बैकुंठ चली गे होने न। चाची जी शैद मिगी ग्रां दा जागत समझियै अपने बसाह च कुत्तै थाहर देई बी देन, पर तेरे गोआंडी-सरबन्धी! ना बाबा ना।

अमला: बड़ी बदनसीबी ऐ रमेश, सहाड़ी इस नमीं पीढ़ी दी। में ए निं आखदी जे ए पीढ़ी बिल्कुल निर्मल ऐ, ओदे च कोई त्रुटियां नेईं, पर इस पीढ़ी दे बारे च प्रौढ़ पीढ़ी दी ए बेबसाही ते बड़ी गै ना-मनासब ऐ। मिगी ते केईं बारी ए बिस्सले कंडे साईं चु 'बदी ऐ।

रमेश: ए दों मनोविज्ञानें दी टक्कर ऐ अमला। इसी तालेआ नेईं जाई सकदा।

ज्ञा: पर केईं बारी ए गल्ल बड़ा रौद्र रूप लेियै भड़की पौंदी ऐ ते ओदे शोरें च केईं कोमल भावनाएं दे गुल्थ भरझोई जन्दे न। इस्सै म्हल्ले च दो-चार महीने होए, इक इस्सै चाल्ली दा इक प्रसंग घेटेआ हा- इस्सै बेबसाही गी लेियै।

रमेश: अच्छा! के गल्ल होई ही ?

अमला: इस म्हल्ले च इक रिटायर्ड कंजरवेटर आव फॉरेस्ट्स न। बड़े पैसे आले न। उ'न्दा बड़ा जागत बी कोई अफसर-ऐहलकार ऐ। ओ कुत्तै बाहर ऐ। ओदी कुड़ी इत्थै अपने दादा जी कोल रहियै कॉलेज च पढ़दी ऐ। मेरे कोला इक ब'रा अग्गें ऐ। यूनिवर्सिटी दे इम्तेहान कोल आए तां कुड़ी ने दादा जी गी इक-दों मज़मूनें च प्राईवेट 'कोचिंग' दा इन्तजाम करी देने लेई आखेआ। लड़कें दे कॉलेज दे इक प्रोफेसर गी, कंजरवेटिव साहब ने पोतरी दी ट्यूशन पढ़ाने आस्तै मनाई लेआ।

: अमला, शैहरें च ए मास्टर, प्रोफेसर ट्यूशनों खूब करदे न। ए बी इक नमां कारो-बार होई गेआ ऐ। इस धन्धे ने अध्यापक-वृत्ति गी खासा बदनाम कीता ऐ ?

रमेश: गरीब मुल्क ऐ रमेश। अध्यापक बचारा बी के करै। माड़े, स्वार्थी लोक हर थाहर होन्दे न, पर ट्यूशन करना कोई बड़े मान-आदरै दा ते धन्धा नेईं। अध्यापक बचारा इस मरजादा-हीन समाज च अपनी सफेदपोशी गी कि'यां नभा ? तां गै ओ बचारा ए जिल्लत जरदा ऐ।

: जरन दे ए जिल्लत बचारे गी, तूं गल्ल अग्गें सुना। ए बहस फ्ही कुसै बल्लै करगे।

रमेश: गल्ला दी तार ते तूं आपूं त्रोड़ी ही।

रमेश: ओह्, आई ऐम सो सारी मेडम। ( मिगी इस गल्ला पर बड़ा बसोस ऐ ) ( हसदा ऐ ) अच्छा, पही ओ ट्यूशन शुरु होई जां नेईं ?

अमला: दुए दिन प्रोफेसर साहब कुड़ी गी पढ़ान आए पर इक नमीं बखैध उट्ठी खड़ोती।

रमेश: नमीं बखैध कनेही ?

दृश्य २ (फ्लैश-बैक)

( काल बेल्ल बज्जने दी छेड़ )

नौकर: ( दरवाजा खोलियै ) जी, कोदे कन्ने मिलना ऐ ?

प्रोफेसर: मिलना नेईं, पढ़ाने आस्तै आयां, जा आख प्रोफेसर साहब आए न।

नौकर: जी, आओ, आओ। ओ पढ़ने आस्तै बैठी दियां न। उप्पर साहब दे कमरे च न। ए पैड़ियां चढ़ी जाओ साहब।
( पैड़ियां चढ़ने दी आवाज )

कंसरवेटर: आओ, प्रोफेसर साहब। रेणु, प्रोफेसर साहब आई गे न।

रेणु: ( आइये ) नमस्ते, प्रोफेसर साहब।

प्रोफेसर: नमस्ते। पढ़ने आस्तै कुत्थै बौना ऐ ?

कंसरवेटर: इस्सै दवानखाने च पढ़ग प्रोफेसर साहब।

प्रोफेसर: पर, इत्थै तुसेंई दिक्कत होग।

कंसरवेटर: नेईं, नेईं, असेंई कोई दिक्कत नेईं होन लगी। तुस इत्थै गै पढ़ाओ इसी।

प्रोफेसर: तुसेंई भाएं मेरे पढ़ाने करी कोई दिक्कत नेईं होग कंसरवेटर साहब, पर मिगी जरूर होग।

कंसरवेटर: तुसेंगी ? तुसें गी दिक्कत की होग ?

प्रोफेसर: मिगी, साहब पढ़ाने च दिक्कत होग, तु'न्दे कारण।

कंसरवेटर: के मतलब ?

प्रोफेसर: मतलब ते बड़ा साफ ऐ कंसरवेटर साहब। तुसें मिगी पढ़ाने आस्तै सद्दैया ऐ। में प्रोफेसर आं। दस-बारां ब’रे होई गे न मिगी कॉलिज चा पढ़ान्दे पर इक दिन बी कुसै गी इस चाल्ली पैहरे च बठाइयै में पढ़ाया नेईं। प्रोफेसरें दे पढ़ाने पर निगरानी रक्खना मिगी बरदाश्त नेईं होग साहब तुस मिगी रेणु गी इत्थै अपनी निगरानी च पढ़ाने आस्तै आदेश देओ, ए गल्ल मिगी पसन्द नेईं। मिगी एदे पर सख्त इतराज़ ऐ।

कंसरवेटर: इतराज़ की ऐ तुसें गी ?

प्रोफेसर: तुस मेरे इखलाक गी शक दियें नज़रें कन्ने दिक्खो ते कन्ने पुच्छो जे मिगी इतराज़ की ऐ ? तु'न्दी इस ज़्यादती पर मिगी इतराज़ की नेईं होग? में इस

चाल्ली पैहरेदारी च रेहियै नेईं पढ़ाई सकदा। में इसी अपनी तौहीन समझनां।

कंसरवेटर: (भलखोड़यै) दिक्खो जी, तुस तिलै दा ताड़ बना करदे ओ पर रेणू पढ़ग तां इत्थै, इस्सै कमरे च। जुआन कुड़ी गी में तु'न्दे कन्ने इक्कलै........

रेणु: (चीख-जन मारियै) दादा जी! तुसैं पता ऐ जे प्रोफेसर साहब दी धी मेरे कन्ने गै कालेज च पढ़दी ऐ।
[ चुप छाई जन्दी ऐ। दीवार घड़ी दी टिक-टिक ]

अमला: ते प्रोफेसर साहब उठिठयै चली गे। उस्सै दिन रेणू ने अपनियां सारियां कापियां-किताबां किटठयां कीतियां ते कोठी दे लान च ढेर लाइयै अग्ग फूँकी दित्ती। दादा गी झुनक लग्गी। पैहले ओ पोतरी पर लाल-पीले होए, उसी बुरा-भला आखन लगे, पही भलखोए दे ओदे कोला माफी मगन लगे, पर रेणू ने कालज पढ़ने जाने कोला इन्कार करी दित्ता ते अपने पिता गी सारा मामला लिखी भेजेआ। उसने उ'न्नेईं लिखिआ जे ओ आइयै उसी लेई जान। ओ इस जगहे प्रोफेसर दे इस अपमान दा अपराधी समझै करदी ऐ। इत्थें ओदा रौहना सम्भव नेईं।

रमेश: पर अमला, रेणू दी इस भावुकता गी तूं ठीक समझनी ऐं? दादा दी बेहूदा हरकतें पर हलकान होइयै इस चाल्ली "कैरियर" तबाह करी लैना कुत्यों दी अकल मन्दी ऐ?

अमला: तूं हसाब दी, गणित दी गल्ल करै करना ऐं रमेश, पर ए 'कामायनी' दा प्रसंग ऐ, हिरदे दी कोमल भावना दा प्रश्न ऐ। ए प्रश्न अर्थ-शास्त्र जां नीति-शास्त्र दे नियमं कन्ने हल्ल नेईं होन्दा। रेणू दे उस दकियानूसी दादा ने सिर्फ उस बचारे प्रोफेसर दा गै अपमान नेईं हा कीता। ए ओदे कोला बी बद्ध रेणू दा अपमान हा। प्रोफेसर बचारे गी ते, ठीक ऐ कंसरवेटर नेईं जानदा होग, पर क्या ओ अपनी पोतरी गी बी नेईं हा जानदा-पछानदा?

रमेश: ठीक ऐ अमला, पर सारा दोश रेणू दे उस बुड्ढे दादा गी बी ते नेईं दित्ता जाई सकदा। तूं मन्त्री दा ओ 'एतराफ' अखबारें च पढ़ेआ गै होग जे सिर्फ राजधानी च गै पिछले च'ऊं-पंजें महीने च 60-65 कुड़ियें-जनानियेें गी नसाई जां कढी लेई जाने दियां वारदातां होइयां न जि'न्दे चा अजें तोड़ी सिर्फ 40-42 गी गै पुलस बरामद करी सकी ऐ।

अमला: एदा क्या ए मतलब निकलदा ऐ रमेश जे हर जोआन धी-धियाना पर पैहरा लाई दित्ता जा ? में इससै बे-बसाही दी गल्ल करै करनी आं।

रमेश: ना, ए गल्ल तेरी ठीक ऐ, पर अजें दे समाज च जिस चाल्ली जीवन मरजादा-हीन होन्दा जा करदा ऐ, ओदे च इस बे-बसाही दी इस समस्या दा समाधान कु'न करै? लै भई हुन ते पक्खे दी हवा बी गर्म होन लगी पेई ऐ। ए बारी तू बंद करी रक्खी दी ऐ। खोलां इसी? बिन्द तेरे म्हेल्ले

दा नजारा बी त' लम्बी जाग ।

अमला: तेरी मर्जी, मैं, ड'आं। इसी बन्द गै रखनी आं। इस खोलो तां ओ सामने सिड़के पर टैक्सियें-टैंपुएं दी भों-भों पढ़न गै नेईं दिन्दी। दूर इत्थें, बारी खोलियै इक बारी खड़ोई जाओ तां ओने-जाने आली लुकाई दे इस चंचल दरया च मनै दी किश्ती बी डोलके खान लगदी ऐ। ए रंग-बरंगी दुनिया बी जि'यां इक चलदी-फिरदी एलबम सेही होन्दी ऐ।

रमेश: दुनिया गी दूरा दिक्खने च बी इक मजा औन्दा ऐ अमला।

दृश्य ३

अमला: तमाशबीन बनने च गै मजा ऐ रमेश। पर ए तमाशबीनी जुड़ै कि 'यां जिन्ने चिर तु'न्दा चित्त नचिन्त नेईं होए, तुसेंईं किसे चाल्ली दी परेशानी नेईं होए ? पर किन्ने लोक होंगन इस चाल्ली दे जि'नेंगी नकेबलै खड़ोइयै मज़े ने दूरा दा, दुनिया दा मुजरा लैने दी खुशी नसीब ऐ ?

रमेश: तूं किन्नी बदली गेईं ऐं अमला ? रूं-च-रूं बरें दे बा'द मैं इत्थें आयां, पर तेरियां गल्लां सुनियै सेही होन्दा ऐ जि'यां तूं ओ पैहले आली अमला रेहदी गै नेईं एं। तुगी दुनिया गी कोला ते दूरा दिक्खन दा फर्क कंदूं दा समझ आई गेआ ऐ? तूं कॉलेज च क्या फिलासफी त नेईं पढ़ी ?

अमला: ( हस्सियै ) नेईं पापा जी, फिलासफी पढ़ने-समझने दी थबीक मेरे च नेईं। में ते रमेश, कालिदास दियां रचनां पढ़ियां न, संस्कृत दे किज काव्य ते नाटक पढ़े न। मैं हिन्दी दा साहित्य पढ़ेआ ऐ, डोगरी दी कविता पढ़ी ऐ। इस दुनिया गी सिर्फ फिलासफी गै दूरबीना कन्नै नेईं दिक्खेआ जाई सकदा रमेश ! दुनिया ते इक खु'ल्ली दी पोथी-जन ऐ। हालात दी हवा पत्तरे उलटदी-पलटदी रौहन्दी ऐ। ए मेरा महल्ला बी इस्से पोथी दा इक लौका सर्ग ऐ, जां समझी लै इस वृहद रंगमंच दा इक लौहका संस्करण ऐ। ओ सामने सफेद पलस्तरे आली पुरानी हवेली दिक्ख करना ऐं रमेश ?

रमेश: ओ? ए ते कोई खासी बड्डी हवेली सेही होन्दी ऐ।

अमला: ऐ ते बड्डी हवेली गै ही। एदे मालक दवान, कदै बड़े दबदबे आले लोक हे, पर अज्ज ड'न्दी ए हवेली? इसी हवेली आखदे बी मन झकदा ऐ। तूं दुनिया गी दूरा दिक्खने दी गल्ल करां करदा हा ना। पर शैद तुगी ए बी पता होना ऐ जे दुनिया दी इस जीवन-धारा च इक छाया-ग्राहिणी राक्षसी बी रौहन्दी ऐ जड़ी दूर गासा उडुरदे जीवें गी बी अपनी माया कन्नै ख'ल्ल खिच्ची लैन्दी ऐ।

रमेश: अच्छा! वाह भई, तूं ते इस जीवन-धारा गी बी भलेआं सोधी लैते दा ऐ।

अमला: सोधी लैत्ता दा नेईं, पर सोधी लैने दा जतन ते हर कोई करदा ऐ। मैं भागवान आं जे इत्थें बिन्द उच्चे कुप्पड़ै पर खड़ोइयै ए मुजरा लैन्नी आं। इस करी

लैहरां मेरे तगर नेईं पुजदियां। पर इ'नें लैहरें उस बचारे गी ते जि'यां ग्रसी गै
लेआ हा।

रमेश: कु'न हा ओ ? कोदी गल्ल करै करनी ऐं तूं ?

परदेसी: खबरें कु'न हा बचारा। पता नेईं कुत्थों आया हा। पर आया हा
इस अनजान धरती पर जे जीवन-निर्वाह दी कोई सबील करी सकै। उस्तै
सफेद हवेली च इक कमरा कराए पर लैइयै रौहन्दा हा। में ते उस बचारे
गी कदै उस रूपै च दिक्खेआ नेईं हा, पर जि'नें दिक्खेआ ऐ ओ आखदे
न जे ओ बड़ा गै सरल, बड़ा गै किंदै आला ते बड़ा गै शैल हा।
: करदा के हा ? इस तेरी नगरी च आखर ओ आया हा तां कोई धन्धा बी तां
करदा गै होग।

अमला: कुसै मकामी अखबारा दे दफ्तरा च कम्म करदा हा, पर ओदा ओ गैरतू
आला सुभाऽ गै ओदा बैरी बनै करदा हा। लोक ओदी साफ-सुथरी
रैहत-बैहत दिक्खियै जलदे हे। ओदे पर शक्क करदे हे। दोखी सुभाएं दा
कम्म इस्तै शक कोला शुरु होन्दा ऐ।
: कनेहा शक, कैदा शक ?

अमला: इ'थै जे इस आदमी दी ए रैहत-बैहत चलदी कि'यां ऐ ? रुट्टी ए होटल
च खान्दा ऐ। नेम कन्ने चाऽ-काफी पीने दी बी उस आदत ऐ। सिग्रट बी
शैल पीन्दा ऐ। टल्ले शैल साफ-सुथरे लान्दा ऐ। बधियां पन्ने कन्ने
लिखदा ऐ। इन्ना खर्च कि'यां चलदा ऐ एदा। ए ए कु'न ?
: शक ते होना कुदरती दा अमला। जो आदमी जीवन-निर्वाह आस्तै कम्म-
काज तुपदा इत्थें आया हा, उ'थै राजकुमारें सांई रौहन लगी पवै- तां लोकें
बचारे दे भरमट्टै ते चकौंगण गै। शक दी ते गुंजैश ऐ गै ही। लोकें दा एदे
च के दोष ऐ ?

अमला: लोकें गी दोष इसी करी दिन्नी आं रमेश, जे ओ तिल दिखदे न ताड़ नेईं
दिखदे, राई दा दाना उ'नें गी नजरी आई जन्दा ऐ पर पर्वत उ'नें गी नजरी
नेईं औन्दा। इससे शहरा च के, इस मोहल्ले च बी ऐसे केई घर न जि'नदे पर
लक्ष्मी छप्पर फाड़ियै आई बड़ी ऐ। जि'नदे कोल कराए पर शैल मकान
लैने दी थबीक नेईं ही, ओ अज्ज कोठियें-कारें दे मालक बनी गे न। इ'नें
शक्की लोकें दियां नजरां इ'नें नमें लखपतियें पर कीं नेईं ठैहरदियां? उ'नेईं
कदै कुसै नेईं पुच्छेआ जे भलेमानसओ, तुसें ए कामधेनु कुत्थों थोई ऐ?
तु'न्दै ए कल्पवृक्ष कि'यां जागी पेआ ऐ, जिसी ल्हान्दे गै मोहरें दी बरखा
होन लगदी ऐ?
: तां में आखेआ हा ना जे तूं किन्नी बदली गेई ऐं? तेरे च क्रांति दे औंकर
दिक्खियै मिगी चबात लग्गा करदा ऐ। तेरे सुभाऽ च ए चिड़ ते खिंझ आई

गेई ऐ। तूं ए गल्लां सोची-सोचियै अपनी सेहत की खराब करै करनी? की गल्ल ऐ ?

अमला: गल्ल नेईं पर इस चाल्ली सोचना कायरता ऐ रमेश। इन्ना नंगा पाप घटदा दिक्खियै बी आदमी नजर परताई लै ? ए ते उस पापै दा समर्थन करने तुल्ल ऐ। उस बेचारै परदेसी ने साफ टल्ले लाई ले तां समान की बुद्दी पेआ?

रमेश: पही के होआ अमला? ओ परदेसी नस्सी गेआ शैहर छोड़ियै जां नेईं? मिगी तूं इस चाल्ली घूरियै की दिक्खै करनी?

अमला: सोच्चै करनी आं तु'म्मी दूए लोकें आंहुगर गै सोचना ऐं। तूं उसदी ज'गा होन्दा तां शायद नस्सी गै जन्दा, पर ओ नस्सने आला नेईं हा। ओ रावण दी इस लंका च बभीखन आला लेखा डटेआ रेहा। पर जिस बेल्लै ओदे कन्ने कम्म करने आले सहयोगियें बी उसी उस्सै सन्देह दी भावना कन्ने पुच्छेआ जे आखर ओदा ए खर्च कि'यां चलदा ऐ? ए भेद ऐ के?

रमेश: पही उसने के आखेआ?

अमला: उसने ड'नेईं आखेआ - ए मेरी साधना दा मुल्ल ऐ।

रमेश: साधना दा मुल्ल?

अमला: उसने आखेआ - में अपनी साधना बेचनां - होर के पुच्छदे ओ। लोक हजारां धन्दे चोरी छप्पे करदे न, मेरा ए धन्दा तु'न्दे मनै च इन्ने खतोले क जगान्दा ऐ?

रमेश: कनेही साधना बेचदा हा ओ परदेसी?

अमला: इ'थै सोआल लोक बी पुच्छदे हे। साधना के होन्दी ऐ? उसी ए की बेचदा ऐ? कु'न खरीदेदा ऐ? ए कनेही जिन्स ऐ? कुत्थें बिकदी ऐ? कु'न लैन्दा ऐ?

रमेश: जो सौदे पर्देदारी च होन्दे न, उ'न्दे बारै च खतोला होना ते कुदरती गल्ल ऐ अमला। साधना दा सौदा ओ परदेसी बी पर्देदारी च की रखदा हा? स'बनें दे सामनै ए सौदा की नेईं हा करदा?

अमला: नेईं करदा हा, ओदी मरजी। अपनी आत्मा दा सौदा किन्ने जने दूएं दे सामनै करदे न? लोकें गी दर-असल खतोला उसदी साधना खरीदने आले ओदे गाहकें गी जानने दा हा।

रमेश: कु'न हे ओ गाहक? इक हा जां मते हे? तुगी ते पता होना ऐ।

अमला: में जानियै बी नेईं जानदी रमेश। कोमल फुल्लें-कलियें दियें पत्तियें गी खुंडी-खुंडी दिक्खने-परखने च के लाह ऐ? क्या इस धरती पर कदैं साहित्यकारें दी साधना बिकने खरीदने दे किस्से तूं नेईं सुने?

रमेश: सुने न, पढ़े बी न, पर इसी कोई भला कम्म ते नेईं समझेआ गेआ। भेत

खु'ल्ली जा तां लोक हसदे गै न।

रमेश: कोदे पर ?

परदेसी: बेचने आले पर बी ते खरीदने आले पर बी।

दृश्य ४ (फ्लैश-बैक)

( दो जुआन गड़ाके। बड़े संजमपूर्ण ते नरोए, कोमल )

जनाना आवाज़ (अपरणा): पर तुसेंईं इस चाल्ली अपनीयां ए रचना बेचियै दुख ते नेईं होग ?

मर्दाना आवाज़ (परदेसी): दुख ? दुख-सुख बड़े बचित्तर शब्द न, अपरुणा देवी। जि'नें दुख दियें लेहरियें च सुक्के पत्तरे सांईं उड़दा में इत्थें तेरै बागै च आई पुज्जां, ओ लेहरियां हुन जि'यां परतोई गेइयां न। ए बी ते इक सुखै दी स्थिति ऐ। जीवन दे ए दिन इस चाल्ली आराम च गुजरी जांगन, इसी दुख कि 'यां आखां ?

अपरणा: बिपदा च मां अपने ज्याणें गी बेचियै जे अपनी सुख-सुबधा दा सम्पान बनाग तां दुनिया आले ..........

परदेसी: जिस दुनिया कोल उस लचार माऊ दी उस बेबसी दा लाज नेईं, उसी ओदे पर हस्सने दा अधिकार की होए ?

अपरणा: जो रचनां तुस मेरै आस्तै लिखोगे ओ ओ बिलकुल मेरियां होई जांगन। तुस कदैं, किसे प्रसंग च बी, उ'न्नीं, अपनी रचना दे तौर पर चर्चा नेईं करोगे ओ ?

परदेसी: ए ते होग गै। जि'नें रचनाएं गी मैं मेहनताना लेइयै लिखग उ'न्दा मेरे कन्नै इन्ना गै सरबन्ध होग जे ओ मेरे जीवन-निर्वाह दा उपाऽ बनियां हियां।

अपरणा: ए रचनां जदून में कताबी शकलां च छपवांग, तदून ओदी भूमका तुसें गी गै लिखनी पौग।

परदेसी: उस भूमका आस्तै पछी तुसेंईं मेहनताना देना पौग।

अपरणा: ओ ते देंग, पर तुस गल्ल कदैं नेईं भुल्लेओ जे अपरुणा विधवा ऐ ते तुस इस मकानै च इक कराएदार ओ।

परदेसी: दोऐ गल्लां बी में भलेआं जानन।

अपरणा: इक गल्ल होर। ए दुनिया इस चाल्ली दे सौदे पसिन्द नेईं करदी।

परदेसी: में जानन। मेरे पासेआ दुनिया गी इस खरीददारी दी सूह बी नेईं लग्गग।

अपरुणा: दुनिया दी, सूह लाने दी शक्ति बड़ी पैन्नी होन्दी ऐ तुसें बी अपनी इक रचना च इस गल्लै पर बड़ा तिख्खा व्यंग कीते दा ऐ, पर मेरी पैहली छपी दियें रचनाएं च ते इ'नें नमियें रचनाएं च जो फर्क ऐ, क्या ओ दुनिया दियें नज़रें कोला छप्पेआ रौहग ?

परदेसी: दुनिया दी भाएं नज़र बड़ी तेज होग पर मेरे इ 'नें ओठें दे पिच्छें कैद इस राज़ गी ओ दिक्खी नेईं सकग। इस गल्ला दे बारे च तुसें गी कोई चिन्ता नेईं

करनी चाहिदी। तु'न्दे कोला थ्होने आला ए मेहनताना में किसै कीमत पर बी छोड़ी नेईं सकदा।

अपारणा: तु'न्दे इस मेहनताने कोला बी मेरे मान-इज्जत दा प्रशन ज़्यादा कोमल ऐ।

परदेसी: मेरी इस होने आली आमदनी दा दारोमदार इस्सै गल्ला पर टिके दा ऐ, इस्सै गल्ला पर एदा दारोमदार ऐ, इस गल्लै गी मैं बड़ी चंगी तरहां समझनां। दुनिया गी ते दुखी लोकें कन्हे हमदर्दी होनी लोड़दी ऐ, उसी स्हाड़े इस भलोके समझोते पर दुक्ख-जलन की होन लगी।

दृश्य ५

रमेश: अमला, तां इस हवेली दी ओ बिधवा खासी बख्तावर ही। इस चाल्ली, दुए दियें लिखतें गी अपने नां कन्हे छुपाने दे इस धोखे च के चतुराई समझी उसने ?

अमला: चतुराई दी गल्ल नेईं ऐ रमेश। जीवन गी जीने जोग बनाने दी लालसा बड़ी बुनियादी चीज ऐ।

रमेश: पर जीने आस्तै क्या इस चाल्ली दा झूठा दिखावा बी ज़रूरी ऐ ? जे किश अस नेईं ऐं, उ'थै बनने दी लालसा असें गी की होइ ऐ ? ए के मखौल ऐ अपने कन्हे ?

अमला: झूठे दिखावे पर रोह मिगी बी औंदा ऐ रमेश बाबू, पर ए झूठा दिखावा कुत्थें नेईं ऐ ? ओ दिक्ख.... उ'नें जुआन कुड़ियें गी। इ'न्दे टल्ले, इ'न्दे बाल, इ'न्दी टोर, ए बाजारू गड़ाके, ए उथली गल्ल-बात, अपने आले-दुआले कोला सं'गने दी भावना दे हुन्दे बी ए लापरवाही दी नमैश। ए इ'न्दा असली रूप ते नेईं रमेश। जागतें गी बी दिक्खना गै। क्या झूठे दिखावे दी कुते कमी ऐ ?

रमेश: पर अमला, अपरुणा देवी ते विधवा ऐ।

रमेश: उसी इस चाल्ली दी कमजोरी दा शिकार होने दी के लोड़ ही ?

अमला: उ'थै ते मैं आखै करदी ही। जुआन्नी च गै विधवा होइयै जे ओ बेचारी इस चाल्ली दे झूठे स्हारें पर ललचोई गेई ऐ तां किन्ना-कू बुरा ऐ। ए कोई अनाचार ते नेईं, रमेश ? इक ज़रूरतमन्द साधक दी आर्थिक मदद करने दा पुन्न बी ते एदे च रले दा ऐ।

रमेश: ना, इस गल्ला पर लोकें दे कालजे की धुखन-जलन लगे हे ?

अमला: इ'थै ते गल्ल ऐ बाबू जी। जिसी ओ ठेडे-ठोकरं खन्दे दिक्खने दा सुख पाना चाहन्दे हे उ'थै जे इस चाल्ली ठसके कन्हे रौहन-बौन लगी पवै तां उ'न्दे अहम गी ठेस ते लगनी ही। ओदा मुस्कराना उ'नें अपना निरादर सेही होन लगा। उ'न्दी शक्ति दा अपमान सेही होन लगा।

बाबा: जोरा आलें दियां, पैसे आलें दियां तलियां चट्टे आले ए मक्कार दुनिया आले दरअसल किन्ने डरपोक न। इक आदमी दा हसना-मुस्कराना दिक्खियै बी इ 'न्दा चित्त कप्पी जन्दा ऐ। ए कमाल ऐ ?

अमला: ठीक कीता उस परदेसी ने जड़ा इस चाल्ली दियें चु 'ब्बें गी मुस्कराई-मुस्कराई जरदा रेहा।

बाबा: होर रस्ता बी के हा ? इक कोमल आत्मा गी इ 'नें बेक्यासे लोकें दियें निर्दई नजरें कोला बचाने आस्तै ओ मुस्करान्दा रेहा, ते निन्दा बदनामी दे तर्कें-सल्लें गी जरदा रेहा।

बाबा: फही के ओआ अमला ?

अमला: पर दुनिया दी नजर बी इक चीज ऐ रमेश। उसने उस साधक दा पीछा करदे करदे उस जोआन विधवा गी तुप्पी गै लेआ। फही उस परदेसी पर बार होर बी करारे होई गे। उसी उ 'नें लुच्चा-लफंगा आखेआ। अखबारें च ओदे बारे च सनसनी पैदा करने आले लेख छपन लगे तां ओ दुखी विधवा चुप-चाप अपनी हवेली गी बेचियै, अपने कुन्नें रिश्तेदारें कोल इस शहरा कोला दूर चली गई।

बाबा: ते ओ परदेसी ?

अमला: नमें मालकै ने पराने कराएदारें गी कड्डी लाया। ओ परदेसी कुत्तै होर कमरा लेइयै रौहन लगा, पर ओदी दुनिया उजड़ी गेदी ही। उसने जिन्नी हिम्मत पैहले दस्सी ही, हुन अपरणा दे चले जाने पर ओ उन्ना गै कमजोर साबत होआ।

बाबा: उन्ना गै कमजोर ?

अमला: हां कमजोर। ओदी आमदनी घटी गेदी ही। पर फही बी ओ उस शहरा गी छोड़ियै गोआ नेईं। उसे महल्ले उस हवेली दे चक्कर लान्दा रेहा।

बाबा: चक्कर लान्दा रेहा ? ओ की ?

अमला: ओदा उस हवेली कन्नै पता नेईं कैसा कोई रिश्ता बनी गेदा हा जे ओदी जकड़ उसी मुक्त नेईं ही करै करदी।

बाबा: ओह, समझी गेआ। ए बचारा उस विधवा गी प्यार करन लगी पेआ होग। पर अपरुणा उसी बी अपने कन्नै की नेईं लेई गई ?

अमला: अपरुणा इसी अपने कन्नै कुत्थें लेई जन्दी ?

बाबा: फही उसने ए हवेली की बेची ?

अमला: इस दुनिया कोला हारियै।

बाबा: बड़ी कमजोर निकली अपरुणा। अपने जीवन आस्तै जिस कोला सहारा लैन्दी रही उसी बे-सहारा छोड़ियै चली गई।

अमला: अपणा दे मनै दी बी कु'न जानै रमेश ? जड़ी गल्ल मनै च गै रेही जा, इस बारै दुए के अनुमान लान ? ओ दिक्ख रमेश, ओ दिक्ख ओ जागत उस पागल गी कि'यां तंग करै करदे न।

रमेश: ए पागल कु'न ऐ ? उ'चै परदेसी ते नेईं ?

अमला: आखदे न ए उ'थै परदेसी ऐ जेदै मुस्कराने पर ए सारा शैह्र जलदा हा। हुन ए शैह्र किन्ना खुश ऐ।

दृश्य ६ (अन्तिम)

'नाटक'