बावा जित्तो

नाटक दे पात्तर

| पात्तर | विवरण | उम्मर |

[ जसरोटे दा जंगल। राती दा समां । जाड़ै च देवता दी चौकी देने दा सूचक ढोल बज्जा करदा ऐ। बावे दे चेले दे हत्थै च धुफैड़ी (धूफ- धूनी आला पात्तर) ऐ। इक दीया बलै करदा ऐ किश लोक (मर्द ते दोए जनानियां) छिंडै छिंडै बैठे दे मुंडियां हलाऽ करदे न।]

घर रूपो दै ठोगर त्रुट्ठे, औंस नराणै लाई। भले नछत्तर जनम बावे दा, नारीं मंगल गाई ।।

(ढोल पर डगा जोरै दा)

सद्दी पंडत बेड़ै व्हालेआ, रासी नाम रखाई। रासी दा नां रक्खेआ पंतै, जितमल नाम रखाई ।।

[ ढोलै दी अवाज ते बावे दे जैकारे रली- मिली जंदे न। इक जनानी गी पौन आई जंदा ऐ। ओह् जोरें-जोरें सिर भुआड़ना लगी पौंदी ऐ। उसदे खिल्लरे दे केस बी लुआरे खान लगदे न। इन्ने च गै जसरोटे दे राजे दे दो सपाही हत्थे च भल्लां लैते दे आई जंदे न। सपाही स्टेजा पर चौकी च शामल लोकें च, करें इद्धर करें उद्धर तेजी कन्ने आँदे- जंदे न।]

(ढोल फ्ही बज्जी पाँदा ऐ। लोक फ्ही पैले आंगर गै सिर भुआड़न लगी पौंदे न ते बावे दे जैकारे लान लगी पौंदे न)

(ढोल फ्ही बज्जी पौंदा ए ते लोक मुंडियां लुआरदे फ्ही जैकारे लान लगी पौंदे न)

(जोगी ढोल ते सांरगी दे सुर मेलियै, कारका दी लैऽ पर गांदा ऐ)

त्रिगटा दे पैरें इच बसदा ग्हार ग्रां मनभाई। छर-छर करदे नाड़ बगदे, चीड़ें चंवर झुलाई ।। इस्सै धरती जोत जगी ही जित्तो नाम धराई। इक जित्तो इक धी नमानी, होर तीसरा नाहीं ।। दस्सें नैंह, दी घाली खंदा, बिरती ऐ हल-बाही। फ्ही बी दोखी जीन निं दिंदे, रुंरुं मैल समाई ।। चाची जोजा, डैन खुआंदी, मनै च लेई बुरे आई पुत्तरें गी ओ देऐ कमत्तीं, जित्तो दे पिच्छे लाई ।।

(ढोल ते सारंगी दे सुर बल्लें- बल्लें मद्धम पेई जंदे न । स्टेजै पर जोजां दे सत्त पुत्तर रींग बनाइयै नचदे-गांदे आई जंदे न)

( इक पासेआ औना ते दूए पासेआ निकली जाना) (हल्ल चुक्के दे जित्तो दा स्टेजा पर आना। बूआ गौरी सुत्थनू, कुर्त्ता ते कनारी आली चादर लेदे अपने बापू दे पिच्छे-पिच्छे, आवा करदी ऐ। शैल मांजे लश्काए दा इक बल्टऊ उसने सिरा पर चुक्के दा ऐ)

(पर्दे दे पिच्छुआं कारकै दे बोल सनोचदे न )

लेई दे, लेई दे, लेई दे बावला, लेई दे शैल पटारी। गुड्डियां लेई दे ल्हौरी बावला, खिन्नू लेई दे पाठोहारी ।। गुड्डियां बूआ दियां मोतियें जड़ियां, लग्गी ऐ जरी कनारी। सज्जै-खब्बै खि'न्नू खेडे, खेडै बांह्मां लुआरी ।। हत्था खिन्नू छुड़की पेआ, कैसे सगन, बचारी ।।

(चाची खिड़-खिड़ हसदी ऐ ते फ्ही इक-दम सामनै आई जंदी ऐ)

[ जोरै दा गड़ाका मारियै हसदी ऐ। बदल गर्जदा ऐ, बिज्ज मिल्कदी ऐ। स्टैजै पर रोशनी बिल्कुल मद्धम पेई जंदी ऐ। जोजां मैंतर- जन पढ़दी ऐ ते बिच्च बिच्च गड़ाके मारदी जंदी ऐ। गौरी गी धिक्का-जन लगदा ऐ। डरै कन्ने उसदी चीख निकली जंदी ऐ। सिरै पर चुक्के दा बल्टऊ भुंञा पौंदा ऐ ते गौरी मुंहैं दे भार भुंआ डिग्गी पौंदी ऐ। जोजां किल्कारी-जन मारियै चली जंदी ऐ। चीख सुनियै ग्रां दे किश लोक उत्थें आई जंदे न। स्टेजै पर अजें थोड़ी न्हेरा बने दा ऐ।]

(देवता दे थान्नै पर बुआ गौरी बेहोशी दी हालत च लेटी दी ऐ। जित्तो, सिरै दे केश खिल्लरे दे, चप्पी मारियै ते अक्खीं मीटियै कोल बैठे दा ऐ थान्नै कोला किश छिंडै, ग्रां दे किश लोक बी बैठे दे न । इक बड्डी धुफैड़ी च गुग्गल धूप धुखै करदा ऐ।)

सिङनियें दे खादे रखदा, हाजर कला दखाई। जेडा उसदी शरणी औंदा, दिंदा आस पुजाई ।।

(ढोलै दा डगा) (जित्तो पर गुग्गे दी पौन चढ़न लगदी ऐ। सिर भुआड़ दा ऐ)

(चौनें पासें सेती - सरेआं खलारदा ऐ ते हत्थै कन्ने लेटी दी बूआ गौरी गी फांडा करदा ऐ)

[ झुंडा चुक्कियै अपनी पिट्ठी पर मारदा जंदा ऐ] विंगा बिच्च चाची जोजां नजरी औंदी ऐ। झुंडा जित्तो दी पिट्टी पर वजदा ऐ तां जोजा इ'यां बठोंदी ऐ जि'यां झुंडे दी मार उसी गै पवै करदी ऐ। हर झुंडे दे लुआरे कन्ने ओदे मूंहां 'हाए, हाए' निकलदा जंदा ऐ]

(जोजां गुनगुन करदी ते लङादी-लङगदी जा करदी ऐ। पिच्छों दाग्रां दा इक आदमी आई निकलदा ऐ)

ए दुनिया महाभारथ मचेआ, थां-थां होऐ लड़ाई, भलें गी मंदे जीन निं दिंदे, भलें गी ढोई नाईं। रहार ग्रां बी उ'यै कहानी, दुखी होई चंगेआई, सक्की चाची पेश पेई गेई, नित्त गै बैर बधाई। सत्तै पुत्तर मूढ़, घमंड़ी, सोच-समझ कोई नाई, इक्कै हठ जे नां जित्तो दा, देना असें मटाई। पापा शा सब डरदे दिक्खो, कैसी कायरताई, इक्कै जोत दीए दी बलदी, सां-सां न्हेरी आई ।।

(इक पासेआ चाची जोजां बैन-जन पांदी स्टैज पर ओंदी ऐ। ओदे औने दे थोड़े चिरा बा'द गै ओदे सत्तै पुत्तर दूए पासेआ 'हेली-हेली' करदे आई जंदे न। पर माऊ गी रोंदे दिक्खियै सब चुप्प होई जदे न। स्टेजै दे मझाटै जोजां दर्शकें पासै मुंह करियै बैन पांदी ऐ ते उसदे पुत्तर घेरा बनाइयै उसदे पिच्छे आई खडोंदे न]

(स्टेजै पर जित्तो हल्ल चुक्के लंघी जंदा ऐ। पिच्छुआं चाची जोजां दे जागत पुल्ले- पुल्ले पैरें आई निकलदे न।)

(ढोल सरंगी)

अग्गें-अग्गे जितमल चलदा, पिच्छे सत्ते भाई, डडलै उप्पर जाई खड़ोते, जित्तो गी धिक्का कराई। डिगदे-डिगदे जितमल बावै, मूरछा गेई ऐ आई, पुड़छी लैता ऐ मंडलीकै, लैती जान बचाई। बोलै देवता, बचन करै, ते बावे गी गल्ल सुनाई, गल्ल सुनी लै मेरी तूं ब्रह्मना ग्हारा हुन रमेआं नाई, जै रोहू गा तूं बिच्च ग्हारा दै, जिंद तां बचगी नाई।

(ग्रां दिया संधा, इक बक्खी चिट्टी चादर लेदे जोजां बैठी दी ऐ। उसदे पिच्छे उसदे जागत बैठे दे न । दूई बक्खी जित्तो बैठा दा ऐ। कोल गै उसदी धी गौरी चप्पी मारियै बैठी दी ऐ। ग्रां दे किश आदमी दौनें धड़ें दै मझाटै बैठे दे न। ग्रां दे सरपैंच आँदे न तां स'ब्बै जने खड़ोई जंदे न। सरपैंचा दे बेही जाने पर सब बेही जंदे न।)

उस देसै टुरी चलचै धीए, जित अपना कोई नाईं। बोलै बूआ बचनै करै, बापू गी गल्ल जतानी, नेई करेआं करसानी बापू, खागे कनक पुरानी। रुम्बल-त्रुम्बल त्रोड़ी खागे, नाड़ें दा पीगे पानी। ठाके दा जित्तो आखै निं लगदा, करदा ऐ मनमानी ।।

सै सज्जनो, अपनी माऊ-तुल्ल धरती कोला बिच्छड़ने दी ओ डाडी घड़ी बी आई पुज्जी। ते जित्तो ते ओदी ज्यानी धी दौनें च के गल्ल-बात होई ? आओ सुनचै।

झिक्का देसा दे हाकम डाडे, लालच लांदे जानी, लालच लांदे, दगा कमांदे, मुं है पर कढदे गालीं। जित्तो : की कड्ढग कोई गालियां असेंगी ? की कमाग दगा साढ़े कन्ने ? अस ते दस्सें नैहें दी मैह्नतू भरोसा करने आले लोक आं। फ्ही तूं जे मेरे कन्ने ऐं तां अ'ऊं समझनां जि'यां माता वैश्णो गै मेरे संग ऐ। गौरी : इ'नें थेंह कन्ने गै साढ़े कुलै दी कत्थ-कहानी जुड़ी ऐ बापू। (रुन्हाकी होइयै) इ 'नें कोद्दी सौंपना छोड़ी जागे बापू ? सांभ-सम्हाल नेई होई तां बरसांती च ए खोले होई जांगन। जित्तो : (ओदे सिरै पर हत्थ फेरदे होई) जदूं करें परतोई औगे तां मुड़ियै खडेरी लैगे इ'नेंगी। (अत्थरुं पूंझदा ऐ) चल धीए, इस्सै झुसमुसे च इत्थों निकली चलचै। गौरी : इ'यां कि'यां चली पौचे बापू ? ए सब चीजां क्या इत्थें गै छोड़ी जानियां न ? जित्तो : छोड़ी नेईं जागे तां चुक्कियै कि'यां लेई चलगे, ए सारी घरिस्त? अस करसान लोक आं धीए। साढ़े आस्तै हल्ल, पंजाली ते बल्दें दा जोड़ी दा सरिस्ता होना गै जरूरी ऐ। इं'दे स्हारै मुड़ी बनाई लैगे कुतै अपना आलड़ा। गौरी : पर बापू, एह ठौगर, इं'दे एह संज, एह, चौकी छुआड़ चौरी... ते मां दी नशानी एह तुलसी (रोन लगी पौंदी ऐ).... जित्तो : तूं अपनियां खडालीं बन्नी लै कुसै टल्ली च, ते इक बारी नजर मारियै दिक्खी लै इ'नें ठौगरें गी ते तुलसी गी। मत्था टेक बच्चू, माता दुर्गा गी ते आ धीए निकली चलचै।

(दौए जने मत्था टेकदे न ते फ्ही जित्तो बुछकड़ी चुक्कियै गौरी कन्ने निकली जंदा ऐ)।

(जोगी)

तज्जी दित्ता ऐ ग्हार बावे ने, पही बंदी ऐ त्रिगटा माई, तूं ऐं सच्ची दुर्गामाता, अस तेरी गै शरणाई। मूंदै हल्ल, पंजाली बावे ने, औंगली कन्या लाई ।।

(विंग चा ढोलकी ते चिमटा बज्जने दियां अवाजां औंदिया न। विंगै चा चाची जोजां दे सत्ते जागत गीतड़ नृत्य दे ताला पर नचदे-नचदे आई जंदे न।)

(गांदे- गांदे बाहरा रा गी निकली जंदे न)

( दूई बक्खी दा बाबा जित्तो हल्ल- पंजाली चुक्के दे जा करदा ऐ। बूआ गौरी बी कन्ने - कन्ने टुरै करदी ऐ। बूआ टुरदे-दुरदे मुड़ियै पिच्छे दिक्खन लगी पौंदी ऐ तां जित्तो बी रुकियै पिच्छे दिक्खन लगी पौंदा ऐ।)

( चाढ़ पाने आले लोक टीन, कनस्तर बजांदे, रींगा च हेली- हेली करदे इक बक्खी दा आँदे न दुई बक्खी गी निकली जंदे न। विंग च आदमी दी चीख सनोचदी ऐ। हाए, खाई उड़ेआ (इक फटेहाल बुड्ढा सुदाई आदमी दाखल हुंदा ऐ। सिरै दे बाल खिल्लरे दे गल फट्टे दा खिलका, लक्कै पर इक मैला जनेहा पजामा। डंगोरी हत्थै च)

फट्टे दा चोला होआ पराना कोई नि सींदा दरजी, मनै दा मैहम कोई निं मिलेआ, जो मिलेआ, अलगरजी। ओ मेरे राम कालेआ हिरना, जंगल चरनां, पत्तर न जिंदे पीले जी जिंदे नित बजोगी, (उ'नें) दुखियें दे क्या हीले जी।

कुसै व्याणें दी माई निं मारेओ, नारी दा मारेओ निं साईं। ग'बरु निं मारेओ पुत्तर कुसै दा। त्रैवै फिरन सुदाई। मेरे राम !

मजलो-मजली चलेआ बाबा, गढ़ पंजोड़े आई हल्ल-पंजाली चुक्की दी मूंदै, बूआ औंगली लाई। ओ मेरे राम ! होनी दा एह लेख लखोआ, कुसै निं पढ़ेआ जाई, इक जाडै चा हिरन जे नस्सै, दूऐ जाड़ै गी आई। ओ मेरे राम !

(बाबा जित्तो ते बूआ गौरी, बल्दें दी जोड़ी गी हिकदे- हिकदे आई जंदे न मंच पर)

(ईसो, जित्तो दे ना-ना करने पर बो हल्ल-पंजाली चुक्की लैंदा ऐ। ते त्रैवै जने स्टेजा परा चली जंदे न)

(रुल्लो दे घरै दा पसार। इक पासै रुल्लो लुहार अपनी भट्ठी कोल बैठा दा ऐहना पर रक्खियै थ्होड़े कन्ने केही-खुरपा बगैरा चंडा करदा ऐ। दूई बक्खी इक बिन्ने पर जित्तो बैठे दा ऐ। कोल गै फूड़ी पर गौरी सुत्ती दी ऐ। बुड्ढा ठौकर ते ईसो बी बैठे दे न )

पैर पुआने ते लक्क-धोती, गल जप-माला पाई, रुल्लो कन्ने बावा जित्तो, मैहते दी मंडी आई। बीरसिंह मैता, बजीर राजे दा, बैठा मंडिया आई । सामनै जाइयै जित्तो ब्रह्मणै, सीला बचन गलाई ।। पैरें पौना कीता मैहते नै, बावे गी पुच्छना लाई। कक्का-भूरा ऐं तूं ब्राह्मणा, के मंगन मेरै आई। साढ़े मुलखें जिमीं दा घाटा, अ'ऊं उ'यै मंगन आई ।। चार कनालीं जिमी देई दे हां, करियै खांग कमाई ।। मेरे राम !

(मैहुते दा दबानखाना। फर्शा पर दरी बिछी दी। मझाटै रौंगला झारी चुक्के दे आबा करदा ऐ। मल्ली बुड्ढे ठौकरा कोला लंगदे बेल्ले उसी घूरियै दिखदा ऐ ते मुंडी ल्हांदा ऐ)

(इन्ने चिरा च रुल्लो लुहार ते जित्तो उट्ठियै बझिये गी नमस्कार करियै इक बक्खी खड़ोई जंदे न)

(ढोला गी डगा लांदा ऐ ते निकली जंदा ऐ (उस्सै बेल्लै इक पासेआ जित्तो, ईसो, रुल्लो, बुड्ढा ठौकर ते ग्रां दे किश होर ग'बरु नचदे- गांदे आई जंदे न)

बुड्ढा ठौकरः (नचदे होई) जित्तो तेरे भागें नै ..(सारे जने) से ऊ-आ! ईसो तेरे भागें नै.... (सारे जने) से-ऊ-आ ! कनक जम्मी घेरमां..... (सारे जने) सेऊ-आ! दानें होंगन ढेरमा.. (सारे) से-ऊ-आ! ( सारी टोली सिर नीमें करियें ते बाह्मां फलाइयै नच्चदी ते गांदी ऐ। हत्थें दियें औंगलियें कन्ने फुल्लें दियां मुद्रां बनांदे न। इस चाल्ली नचदे- नचदे दुए विंग चा निकली जंदे न।)

(उस्सै बेल्लै पिछले विंग चा मैहता बीर सिंह सलाह‌कार मल्ली सपोलिया, मोहतबर घग्घी, ते किश नौकर-चाकर इस चाल्ली आँदे ल 'बदे न जि 'यां उ'नेंगी एह बी खतोला होऐ जे कोई उ 'नेंगी दिक्खी नेई लै ! दूए सामनै विंगै चा नच्चनें- गाने दी मद्धम- जनेही अवाज अजें बी आवा करदी ऐ, जिसी सुनियै पैहलें मैहता उद्धर दिखदा ऐ ते फ्ही बाकी लोक बी)

(इन्ने चिरा च जित्तो ते उसदे उ'यै साथी नचदे-गांदे आँदे सुनचदे न) मल्ली : सरकार ! ओ लोक परती आवा करदे ल'बदे न । हून निकली चलना चाहिदा। (वीरसिंह तौला कन्ने मुड़ी जंदा ऐ ते ओद्दे पिच्छे-पिच्छे बाकी लोक बी चली जंदे न।)

(जित्तो गौरी गी औंगली लाइयै बल्लें-बल्लें स्टेजा परा चली जंदा ऐ) रुल्लो : दिक्खेआ रुल्लो जी? नभाने आले कि 'यां धरम नभांदे न? किन्ने होंगन जेडे इ'यां सोचदे न? बाह भई बाह। ठौकर : सच्च आखदे ओ बाबा। न्यांऽ ते सचाई गी पालना बड़ा कठन होंदा ऐ। रुल्लो : तुस लोक चुप की होई गे ओ भई? इस कनकू दी खुशिया च नच्चने- गाने गी मन करै करदा ऐ। 'भाइया ईसो, करेआं शुरु। शाबाशै।

मंडिया ढलदा बीरसिंह मेहता, लैती छतरी खलारी, गुमटा ढलदे बीरसिंह मैहते, तेलियें गी हक्क मारी। नमियां-नमियां छट्टां लैयो, कन्ने लैओ चमेआड़ी, सपाहियें दी अड़दल चलदी आपूं चलै अगाड़ी। मजलो- मजली चलियै मैहता, बिच्च खलाड़ै आई। हे मेरे राम।

(कनकू दा ढेर लग्गे दा ऐ। उप्पर पाई रक्खी दी ऐ। ते ईसो मेघ सिरै परम नासा लपेटे दे किश गुन- गुन गा करदा ऐ।) माड़ियां कीतियां.... राम जानै। चंगियां कीतियां.... राम जानै ।।

(इन्ने चिरा मैहता, मल्ली ते करिदे तेजी कन्ने खलाडे च पुजदे न। ईसो मैहता, गी दिक्खियै उट्ठी खड़ोंदा ऐ ते हत्थ जोड़ियै ओद्दी बंदना करदा ऐ। मैहता, कनकू दे ढेरा कोल पुज्जियै उसी बड़े गौरा कन्ने घूरदा ऐ। दानें गी तली पर रक्खियै दिक्खी- दिक्खी हरान हुंदा ऐ)

(विंग चा बुड्ढी जोजां आई निकलदी ऐ) जोजां : ओ भाई बचैरेआ ! कनक मनेन्देआ, तेरी नारण पूरी पाई च'ऊं ब्रह्मणें गी खाने गी देना, दे कनका दी पाई मैहतेआ, तू रसदा- बसदा र 'वें, बड़ी दूरा आई, इस कनका दी हीखिया। मिगी बी कनका दियां चार पाइयां दुआऽ मैहता : बै, दे बुड्ढी गी कनका दी पाई। (करिंदा इक पाई कनक उसदी चादरी च पाई दिंदा ऐ।) जोजां : इक पाई कन्ने किश निं बनदा, दे मीं पंड बन्हाई पंड बन्हाई दे पुत्तरा, मेरी तुगी लक्ख लक्ख देआं दुहाई (मैहतै ने शारा कीता ते करिंदे ने होर दो पाइयां चादरी च लुद्दी दित्तियां) जोजां : रसदा- बसदा र 'में मैहतेआ तेरा इकबाल बनेआ र 'वै ईसो : (रौहे कन्ने)! तूं डैने, मूंह कालिये ! इ'नें डाकुएं धाड़एं गी की सीसां दिन्नीं ऐं कबत्तिये। सीसां उसी दे जिस दी लहु-परसीने दी कमाई लटोऐ करदी ऐ जोजां : (कनकू दी पंड सिरा पर चुक्कियै ईसो गी झूठा दसदी ऐ ते गड़ाके मारदी - मारदी) बै मेघटेआ, सनाई देआं अपने जित्तो गी जे तेरी चाची जोजां तेरा सुख-सांद लैन आई ही। सै लेई चली आं (निकली जंदी ऐ)

ज्यूनी लुहारी ते गरभो नयानी, दौने त्रिंजन डाही, तन्द त्रुट्टी ते सगन बचारन, जितमल फिरेआ आई। जिस ब्राह्मणै दा लुट्टेआ खलाड़ा ओ खिट्टे पेदा आई, कंधा उप्परा आला मारै, देआं कटारा माई। हून के करना कटारा ब्राह्मणा, छोड़ेआ बेला बिहाई।

(ज्यूनी बैठी दी चरखा कत्ता करदी ऐ। इन्ने चिरा च जित्तो दौड़दा- दौड़दा आई पुजदा ऐ) ज्यूनी : (जित्तो बक्खी दिक्खियै व्यंग कन्ने) खलाड़ा बझिये गी सौंपियै, हून कुतांह छालीं मारै करदे ओ भाऊ जी ? जित्तो : माई लुहारिये, तौल कर, अंदरा मेरा कटारा आनी दे। ज्यूनी : (व्यंग कन्ने) के करगा हून कटारा, ब्राह्मणा ? प्हाड़ा देसै देआ प्हाड़ी ब्राह्मणा, तुगी प्हाड़ा दी गै मत्त आई। खल्लड़एं दा खाद्धा आटा, ते नाड़ें दा पीता पानी। साढ़े दैसा दा हुंदा ब्राह्मणा, खाड़ा लैंदा ठानी ।। जित्तो : इसलै ए बिसलियां बोलियां निं मारेआं, माई लुहारिये ! जे होंगी ब्राह् मणै दा बेटा ज्यूनिये तां दस्संग खाड़ा लाई। (अग्गें बधियै कटारा चुक्की लैंदा ऐ ते उसी मत्थे कन्ने लाइयै चुम्मदा ऐ ते आखदा ऐ) जित्तो : तूं मेरा धरमा दा भाई कटारेआ ! पत रक्खेआं मेरे भाई। ज्यूनी : (डरी दी) में ते मखौल कीता हा भाऊ जी। मेरी गल्लै दा गुस्सा नेई करओ।

(मैता डांगें आले सपाहियें गी अशारा करदा ऐ। ओ अग्गें बधियै मारने गी डांगां गूरदे न, पर जित्तो दे कोल कोई नेई ढुकदा। ईसो इक जने दी डांग पकड़ी लैंदा ऐ, पर इन्ने चिरा च दूआ सपाही ओदे पर डांगा दा बार करदा ऐ। ईसो डिग्गी पौंदा ऐ। दो सपाही उसी बाहमें दा पकड़ियै घसीटदे-घसीटदे इक बक्खी लेई जंदे न)

(इक सपाही अग्गें आइयै जित्तो गी डांगा दी गु'ब्ब करांदा ऐ। जित्तो इक खिना आस्तै सुन्न होई जंदा ऐ। फ्ही कटारा कड्ढियै) जित्तो : बड़ी कमीनगी पर उतरी आया ऐं मैहतेआ ! तेरी ए राखसी भुक्ख इ'नें सुक्के गरोले कन्ने दूर नेईं होनी। (छाल मारियै कनका दे ढेरा पर खड़ोई जंदा ऐ) लै इ'नें दानें च में अपना लहु ते मास रलाई दिन्नां। जै दुर्गे, जै बैश्णो माता ! (इन्ना आखियै कटारा छात्ती च घाई लैंदा ऐ ते इक खिन खड़ोता दा रेहियै पही धड़ाम करदा ढेई पौंदा ऐ।) मैहता : (घबराइयै) ना, ना जित्तो। मत करदा होएं ऐसा नर्थ मैहते दे करिदे : हे राम ! हे राम ! (अक्खियें पर हत्थ रक्खी लैंदे न) (विंग चा किश लोक झांकदे न तां सपाही भल्लें कन्ने उ 'नेंई डराइयै पिच्छे करी दिंदे न) मैता : (हरानी, डर) ओह एह ते ब्राह्मण हत्या होई गेई ! ए के नर्थ कीता ई जित्तो ? मल्ली मल्ली : जी सरकार। मैहता : ए ते ब्रह्मण-हत्या होई गेई मल्ली। हे राम ! हुन के होग ? मल्ली : पर मालको जे एह लोथ इत्थें पेदी रेही तां कुशबा सारी जगीरा दे लोक इत्थें आई किट्ठे होन ते कोई पद्रब्ब होई जा। ओ लोक इत्थें आई पुज्जन, एदे कोला पैह लें-पैहलें गै एह लाश इत्थों हटाई देनी चाहिदी। मैहता : (डरे दे) ए लाश ? ......इत्थों हटाई देनी चाहिदी ऐ, पर कि'यां ? कुत्थें रखगे इसी ? मल्ली : (घबराइयै) जाड़ै च सरकार। जाड़ै च कुतै ऐसी जगह छपैली देगे इसी जे काएं ते गिद्धं गी बी सूह नेई लग्गग (आदमियें गी) चुक्को बै, चुक्की लो इस लोथा गी। डंडे पर रस्सी कन्ने ब'न्नियै चुक्की लो ( पैहलें कोई आदमी अग्गें नेई होंदा तां मल्ली आपूं अग्गें बधियै लोथा गी घसीटन लगदा ऐ। एह दिक्खियै बाकी दे र्कारदे बी जाइयै लाशै गी चुक्कियै विंग पासै लेई जंदे न)

(कारका दे बोल)

बड़ा सुहामां देस डोगरा, नेहा देस निं होना होर जी, बिच्च झिड़ी दै बुआ-बावा पूजदे, लोक आई सीस नुआन्दे जी बलिदानी ऐ देस साढ़ा डोगरा नेहा देस निं होना कोई होर जी !!

(पर्दा पेई जंदा ऐ)