ओ हाकम बड़ा हा, बड़ा दबदबा हा,
ओ सुन्ने दी लंका दा मालक खुदा हा,
कम्बदी ही दुनिया, सुनी नाम ओदा,
ते सुरगा-शा सुन्दर हा ओ धाम उसदा।
उ'दी शक्तिया दे बी चर्चे बड़े हे,
इलम ज्ञान दे ओदे झंडे चढ़े हे!
उ'दा जै-जै कारा ओ कुत्थें नेईं हा?
उ'दा डर हा उत्थें, ओ जित्थें नेईं हा।
कंबदी ही सृष्टि, सुरग डोलदा हा,
धरत सैहमी, अम्बर नेईं बोलदा हा ॥
गरजदा तां प्रलया दे दिग्गज गरजदे
चलदा तां लक्खां कलेजे लरजदे;
जे हसदा, मसैहरे तां बलदे हे लक्खां,
जे दिखदा तां तूफान चलदे हे लक्खां!
हवा जिसदी कैदी, बरुण जिसदा कामा,
ते जमराज रौहन्दा हा पावें दी छामां।
ओ सब किश हा भाएं, फरिश्ता नेईं हा,
खुदाई दा दाउवा, खुदा ते नेईं हा।
ए जनता, भलोकी, नमानी बड़ी ऐ,
ए भोली ऐ भाएं, सयानी बड़ी ऐ!
डराया इसी रावणें लक्ख बारी;
ओ आया इ'दे सामनै लक्ख बारी;
ब' रावण दा मन्दर बनाया निं इसने,
ते पूजा च उसगी बठाया निं इसने ॥ ✧