जि'नें आसा दे फुल्लें गी में दुक्खें च खड़ाई सकनां,
में बेआसी दे न्हेरें च जड़े दीए जगाई सकनां,
मेरी कविता दे रंगें च जि'नें ब्हारें दा हासा ऐ,
अमर-संगीत धरती गी जड़ा गाई-सुनाई सकनां,
ओ दीए, फुल्ल ते हासे, तेरे बागें च नेईं मोइये !
मेरे सुर, ताल, लै मस्ती, तेरे भागें च नेईं मोइये !
इ'नें रंगें ते खुशबूएं दा तूं कैसी मान करनी ऐं ?
[1956]
✧
जड़ी टाली झुकी जन्दी ऐ फुल्लें ने ते कलिए ने,
उसी दो चार कंडे बी जे थ्होई जन्दे बुरा के हा?
जि'दे भागें च कंडे न, छड़े कंडे गै कंडे न,
उसी दो चार फुल्ल-कलियां बी होई जन्दे, बुरा के हा?
बिना बेदन, छड़े हासे, बड़े फिक्के, बड़े हौले,
इ'नें हासें गी जे अथरूं बी थ्होई जन्दे, बुरा के हा?
जड़ी सुन्नी नजर, डोलै दुआसी दी बरानी च,
उ'दे हौके कंदें कोई रंगोई जन्दे, बुरा के हा? ✧