नैनें इच जिसने डोरे न, ए मस्त खुमारी कैसी ऐ ?
जिस रूपै गी तूं तुप्पै 'नां, उ'दी पर्देदारी कैसी ऐ ?
की अंग बहुत रमाई तूं, की कन्ने मुंदरां तूं पाइयां,
ए दुनिया छोड़ी जेदे तै, ओ दुनिया न्यारी कैसी ऐ ?
ए बोल नमाने गूंगे न, ए रंग बचरै फिक्के न,
ए नैन सुंदाई के दस्सन, ओ सूरत प्यारी कैसी ऐ ?
नज़रें रस्तै जो उतरी जा, घायल करदी जा जान-जिगर,
तेरी नज़रें इच छप्पी दी, ओ यार कटारी कैसी ऐ ?
नज़रें इच रंग हे ब्हरें दे, नज़रें इच्च अज्ज ए जाले की,
ओ, यार, खमारी कैसी ही, ए हुन लचारी कैसी ऐ ?