तूं समें दी ऐं नशानी-बोल तूं,

बगदे पानिएं दी जबानी-बोल तूं।
गोआही दे, सूरजें दी धी ऐं तूं,
इस चाल्ली चुप-चबीती की ऐं तूं,
तूं ते सब किज अपनी अक्खीं दिक्खेआ,
बीतेआ दबक्खीं जे किश तूं दिक्खेआ।
सदिएं शा खतोहते रेह म्हेशां खड़कडे,
बे-बस, दुखी ओह रेह तड़फदे-
की कुसैं इतिहास ए लिखेआ नेईं?
की नेहा मैंहरम कोई मिलेआ नेईं?
की सिर्फ राजें दी गै कहानी लिखी?
उं'दी मरजियै मताबक, उं'दी जबानी लिखी
मन्नेआ राजें दा बी इतिहास ऐ
वक्त उप्पर हाकमी दा डर बी खास ऐ।
पर इक्क गी इक्की दे सखाने आहले ओ,
पाठ राजभगती दे सखाने आहले ओ।
राज-दरबारें दे घेरों रही करी,
खिल्लतां ते सनदां सौं लेई करी।
जो तुसें लिखेआ-बनाया ऐ जरो,
जो तुसें चुनेआ-सजाया ऐ करो।
अस उसी इन्साफ कि 'यां आखचैं?
ए ते कसीदे-खानिएं दा इतिहास ऐ,
बस्स राजें कन्ने राणिएं दा इतिहास ऐ।
होर बी इत्थें किश होआ जां नेईं,
दुआ कोई लाल माउ जम्मेआ जां नेईं?
डुग्गर दी दत्त, रणपत दी कथ्य की नेईं लिखी,
डीडो बीर बांकड़े दी सरमत्थ की नेईं लिखी,
बावा जित्तो की तेरे मन भाया नेईं
बावा अंबो याद की तुगी आया नेईं
इं'दा की लखोआ ओ इतिहास नेईं ?
इतिहास कन्ने की कीता इन्साफ नेईं
उं'दी कथ्थ बोल, कहानी की होई गई?
सच्चै दी जोत सुच्ची, नमानी की होई गई?
बोल तविए!