ते मेरी दुनिया दे मालक।
ए जड़ी तेरी कताब
धर्म-धरती, रंग-जाति दा निं डर
आदमी भलखोए दा
जादू च बेसुध होए दा
हर कुसै दी डफ्फ अपनी
हर कुसै दा अपना राग
आदमी गी आदमी शा, इस खंडाया ऐ सदा
इसने लड़ाया ऐ सदा
इतिहास सारा गै मेरा, तेरी कताबै दी कथा,
खूनी लड़ाइयां, कतलो-गारत
यलगार ते मारू जेहाद
तबलीग ते तेगो-तबर
तेरी कताब,
हिरख दे बोलें चा नफरत
त्याग दे शब्दें चा कीता
तेरी कताब
आदमी दी आदमी गी नेईं पछान
ए नेईं थोंदी कदें
तेरी कताब
तां असेंगी होना नेईं हा ए खुमार,
जेहदे करी होइयां लड़ाइयां बे-शुमार
ए नशा, नजरें गी जे बन्धी देऐ!
अपनी मखलूका गित्तै
अपनी इस सृष्टि लेई
कैसा ऐ, ए तेरा प्यार
तेरा गै संसार ऐ
तेरी कताब!
बोल तविये!
बोल तविये, तुऐं बोल हां,
ओठ इतिहासै आले, सीते दे खोल!