ते आखै-
"भोलिए! पनछान अपना-आप तूं
तु'म्मी किरण ऐं !
अपने गित्तै होई गेई सन्ताप तूं
हेरे अंदर तूं घिरी दी रही करी
होई गेई इक दाग ऐं!
बेसुरा इक राग ऐं
इक कलि कोमल ही तूं
खिड़ना जिसगी चेतै नेईं
अपने शलैपे दी नेईं जिसगी खबर
ओ बेखबर! तुम्मी किरण ऐं, जाग तूं!"
x x x
मेरी कताब,
मेरे गित्तै ए किरण, इक लाजवाब
रोशनी ऐ,
चन्न-सूरज स'ब्बनें थों सिरमौर ऐ,
ए नेईं हुंदी कुतै।
तां सैंकड़े ए चन्न-सूरज बी कदें
दूर करी सकदे नेईं अज्ञानता दे गुप्प हेरे,
आदमी तां आदमी बनदा नेईं।
x x x
मेरी कताब ए मेरी मिट्टी दी खुश्बू
ए मेरी धरती दी देन,
मेरी धरती दे गै बेटें दी चमक
उं'दी सोचें दा निचोड़
सुच्चे लिखनें दी साधना
सुच्चे लिखनें दी लालसा
सुच्चे लिखनें दी कामना
मेरी कताब
ए नमां रिशता मनुक्खें दा जिसी
धर्म-धरती, रंग-जाति दा निं डर
आदमी लेई आदमी दा प्यार ऐ,
जीवन दा सिंगार ऐ
x x x