हुन ए कार नर्मी होई जानी तुसें ऐ।
सुक्खन जे इक अद्धी, पूरी-पूरी करी दित्ती तुसें
दिक्खेओ पही मियां तुस,
मेले लग्गी जाने न,
जैकारे गूंजी पौने न,
भंडारे खु'ल्ली जाने न।
डोगरें गी हुन बस देवतें दा सहारा ऐ,
डोगरा-समाज अज्ज होई गेआ नकारा ऐ,
इल्मा ते हुनरें दी दौड़ा च पछेडे आं,
हत्थ कम्म करने दी जाच असें सिक्खी नेईं।
रिज़क हलाल दा मियां जुड़दा ऐ मेहनतें ने,
मिहनतें दी पिर्त अजें साढ़ै कोई पेई नेईं
समें कन्ने दौड़ने दा ढंग-थौह आया नेईं
ते तोर इस समें दी, तेज इन्नी होई गेई
जे रथ उस समें आहला नजरी च औंदा नेईं
हां, धूड़ ओहदी चौन्हीं पासें छाई दी सेही होए,
तुसें इस राम रौले कोला पर लैना के?
हुन फुल्लें, अगरबत्तिएं दी सुगंधें इच र'वो तुस
शरधा दे फुल्लें दिया सेजा पर सवो मियां!
परमात्मा कन्ने न्होरा
मेरी कताब तेरी कताब
मेरी कताब
इक किरण- फिक्की जेहड़ी पौन्दी नेईं,
धर्म-जाति, रंग धरती दे इ'नें
कैदखानें कैद जो रौंदी नेईं
मेरी कताब
लोऽ जिदी निरमैल, कोमल
आदमी दी नजरें गी निर्मल करै
सृष्टि दे सौ राज़ खोलै
खोहल्लियै अग्गें धरै,
आदमी दी आतमा गी जो बझालै