शेर डीडो जम्वाल

अजें बी ऐ डाडवा असें-
जे देनदार तेरे आं/परस्तार तेरे आं,
तेरा चेत्ता औंदे इक गौह जागी पौंदा ऐ,
न्हेरा-मन्हेरे इस अपने इतिहासै दे,
सुन्ने गलियारे च
जोत इक जगी पवै।
पर देनदारी कैसी ऐ?
एह कर्जदारी कैसी ऐ?
कर्ज निं चुकाया कुसै
डुब्बे दे आं अपनी गै इस शर्मसारी च।
ते तेरे इस रिणै दियां
देआ 'ने आं किस्तां।
हर साल तेरे इस उजड़े दे थेह पर
चौंकी-जन देने दी रसम नभाई जनें
दिन ए मनाई जनें
ते बरस-गंधें तेरियें गी घोखी लैने, गिनी लैने
दो सौ ते बाहरमी ऐ, तेरी ए जयंती अज्ज।
कुसै कलाकोरें, जिसी अपनी गै कल्पना चा चित्तेआ, बनाया ऐ
उस मूरता ख्याली गी। तेरी तस्वीर मनी
फुल्लें कन्ने पूजने दी पिर्त असें पाई ऐ।
मूरतै दे अग्गें हुन पैसे बी न चढ़न लगे।
बल्लें-बल्लें तुसेंगी बी/असें ए बनाई देना-
बे-जान मोहरा इक / गूंगा कोई देवता
तां जे हुन तुं'दे कन्ने
रिशता मन्खुक्की कोई साढे कन्ने र'वै नेईं
समां पाइयै, लोकें आई जाना गल टल्ला पाइयै
सुक्खनें सरीणिएं तै थान नमीं होई जाना। करचै बी केह मियां?

नोट:-
एह कविता मियां डीडो दी 212 मीं बरस-गंधै मौके ऐतवार, 24 मार्च 1991 ई० गी मियां डीडो दे जरम-ग्रां जगती (नगरोटा) च इक समारोह च पढ़ी गेई जेहदे च राज्यपाल दे सलाहकार वीरेंद्र प्रकाश मुख्य परौहने हे। कविता 23 मार्च 1991 ई० गी लिखी गेई। एह कविता चेतन-प्रवाह शैली च लिखी गेई ऐ। इसी पढ़ियै सेही होंदा ऐ कवि दी चेतना भावें दे प्रवाह च बे-रोकटोक बगदी जारदी ऐ। शुरु च शास्त्री होरें इस कविता दा सिरलेख रक्खेआ—“शरधा दे फुल्लें दिया सेजा पर सवो मियां, जिसी बाद च कवि ने 'शेर डीडो जम्वाल' करी दित्ता।”