कोई जलन निं होऐ तां जीना मज़ा नई,
सुक्के दे रुक्खें तै कदै मौसम बदलदा नई।
सूरत बदलने नै कदै सीरत बदलदी नई,
काग़ज़ दा फुल्ल शैल बी पूजा च चढ़दा नई।
व्वारें दे औने पर कदै पतझड़ निं टिकदी ऐ,
कैसी ऐ ब्वार, बाग़ै च कोई फुल्ल खिड़दा नई।
खंडर किले ते मैहलें दे इक मिसरा गान्दे न,
'दुनिया' च चलदी हाकमी कोई सदा नई।
फूके अनेकां बार न रावण दे बुत्त असें,
करदा तमासे आपूं गै, रावण ओ मरदा नईं।
जीवन दी बत्ता चलदे न, उ'आं ते सारे लोक,
मोड़ें च डेरे लग्गे दे, मंजल दा पता नईं।
इक जैहर ना-बरोबरी फैले दा हर तरफ,
जैहरा दा लाज जो करै, ओ बैद दुसदा नईं।