जि'दी चु'ल्ल धुखदी ऐ, बलदी नेईं ऐ,
जिदे कोल लैने गी जुल्ली नेईं ऐ।
धुखै करदी कोई बारूदी सुरंग ऐ,
गरीबै दी जानो ओ कुल्ली नेईं ऐ।
कढूं दे आं नेहरे दी कैदू च बज्झे,
जे न्हेरे गी आं रोशनी रेह समझदे।
अनेकां गै सूरज ढले बी, चढ़े बी,
छत्तरी ए न्हेरे दी उ'ल्ली नेईं ऐ।
धरम-दीन हत्थ अपने मलदे रेही गे,
सियासत बी हुट्टी करी फांडे-टूने ।
बड़ी गाढ़ी नींदर ज़माने गी व्यापी,
उपाऽ लक्खां कीते ब' खु'ल्ली गेई ऐ ।
सुनो ओस बाबर्दी मान्हू दी तब्बीह,
कतल कोई होआ, ना डाका पेआ ऐ ।
करो अपना-अपना भजन, नच्चो, गाओ,
मढ़ो जिंदगानी नमुल्ली नेही ऐ ।
ढंढोरा, मनादी होए केईं बारी,
फ़रिश्तें हकीमी सम्हाली लेई ऐ ।
ब' रोगी ऐ लागर, निं बोल्ली सकै दा,
ते दंदकीड़ बज्झी दी खु'ल्ली नेईं ऐ ।