जढ़े रोइयै होए पूरे, सुफल ओ सफर नेईं होए,
बगारां करने आलें गी कढें तमगे नेईं थ्होए।
उ'नेंगी के पता खामोशियें दा ताल-लै के ऐ,
जढ़े रौलें च गै जन्मे ते रौलें इच्छ गै मोए।
चमकदे रंग फुल्लें दे, सुगंधी दी निशानी नेईं,
चमेली, मोतिये, कमलें गी गूढ़े रंग नेई थ्होए।
जड़े फुल्लै गी दउवा हा जे ज्वार उस्सै ने आंदी ऐ,
नमें फुल्लें दे खिड़दे गै उ'दे हासे ओ संगचोए।
गली हिरखै दी ऐ, इत्थें बनज-ब्यापार नेई चलदा,
खुशी दी जिन्स जिंदी ही, उ'नेंगी अथरू थ्होए।
इ'नें तारें बचारें ते कदें बी 'ब्याग' नेई दिक्खी,
इ'नेंगी के पता पिछ्छों धरत-अम्बर कनेह होए।
बड़ा गै नाटकी जीवन, ए नट-विद्या बड़ी औखी,
भरम पाले, जदू हस्से; रसम पाली; जदू रोए।