इक पीढ़ी ज़ुरम करदी ऐ, भरदी ऐ दुई होर,
कंडे खलारे जो असें, ए कुन्ने स'लने न ?
हर शैहर लंका होई गेआ, रावण मजे च न,
बलगै दे लोक, सुरगै दा कोई राम ढलने न!
बखताबरी च रॅहम ते इखलाक, इक फरेब,
मारूथलें च कि'यां कोई कमल खिड़ने न ?
सूरज दे बैंस्स कोई नेईं, ओ सब फरेब हा,
शाहनामे राजें-राणें दे किच्चर ए पढ़ने न।
चादर गरीबीया दी ऐ, फट्टी दी तार-तार,
गैरत-गरोले एदे च कि'यां ए स'लने न ?
भागें भरोसे बैठे दे पुछदे डरे दे लोक,
किच्चर ए जोर-जबर ते ए कपट चलने न।
हिसले दे जेहड़े चु'ल्ले न, ज्वालामुखी न ओ,
भांबड़ जदूं बी बलने न, उं'दे चा बलने न।