बस, नां तेरा जपदा र'मां- ए मिगी मन्जूर नेईं,
धूनी रमांऽ बैठा र'मां- ए मिगी मन्जूर नेईं।
तूं मेरे जीवन च आमें, नित नमां सुखनां बनी,
ताबीर में पुछदा फिरां- ए मिगी मन्जूर नेईं।
मन करै उड़्डने गी, तां बी धरती पर बज्झा र'मां,
बस, चूरियां खंदा चलां- ए मिगी मन्जूर नेईं।
जो तूं आखें, सब सुनां, समझां बी नेईं, सोचां बी नेईं,
बस, हां गै हां करदा चलां- ए मिगी मन्जूर नेईं।
बे-रुखी दी नज़र तेरी, डबर ऐ जां झील ऐ,
तरदा र'मा, डुबदा र'मां- ए मिगी मन्जूर नेईं।
तेरी इक्कल-सोखिया दा गौह, तुगी सौ होग पर,
नरगस उसी मिथदा चलां- ए मिगी मन्जूर नेईं।
प्यार दी, विश्वास दी पिट्ठी प' खंजर तूं बनें,
में तेरा पर्दा बनां- ए मिगी मन्जूर नेईं।
तूं सुनें गै नेईं मेरी, बस बे-थवा हसदा चलें,
फही बी में दुखड़ा सुनाऽ- ए मिगी मन्जूर नेईं ॥