मिगी मीरां दी भगती दी सुहामी याद आई ऐ,
फिरी जुलमा ने गीतें पर कुसै दे रोक लाई ऐ।
ओ रानी ही ब' खुसी ले उ'दे अधिकार-सुख सारे,
लगन ओदी गी खुसै कु'न, जो धुन अपनी दा राही ऐ?
हज़ारां साज अनमुल्ले बिके, सुन्ने दी मंडी च,
ब' इकतारा ओ मीरां दा, कुसै कीमत निं पाई ऐ।
जदूं मीरां दी याद औंदी, ओ 'बिक्रम' याद आई जन्दा,
र'वैं चन्ना दे घेरे च जुगें शा ए स्थाई ऐ।
भसम केइयें मली जिन्दू ते भगमी गल फंसाए न,
ब'सुर मीरां दे थोदें नेईं अलख भाएं सौ जगाई ऐ।
मनै दा ताल नेईं जागै तां ए खड़ताल कितकारी,
मटाइयै आप मिलदी जो ओ मस्ती कुन्न पाई ऐ?
समें किन्ने ए बदली गे, समें किन्ने बदले न,
तेरे गीतें दे फुल्लें पर ओ पैहली ब्हार छाई ऐ।
अमर ही साध ओ तेरी, अमर ऐ साधना तेरी,
उ'नें जोतें च इस धरती दी बेदन मुसकराई ऐ॥ ✧