किस रिशते इच ब'न्नी लैंते, दर्दमंद तूं लोक नमाने ?

× × ×
तेरी कहानी दे पर्दे गी
बार-बार चुकदे-पुददे
अपने भावें दे रंगों नै
अपनी सोचें दी "कैनवस" पर
तेरी इक तस्वीर बनाइये
तेरा गौरव अंकत करियै
तेरी इन-कथा दे धुंदले
चि'न निशान कठोरना चाहंदे
मित्ती इच जो खिल्लरी गेदे
मोती इक-इक चुनना चाहंदे-चुनी निं पांदे।
जंगल-झाड़ें कोला, पुछदे
"कैसा हा ओह शेर डोगरा?
किन्ना हा ओह उच्चा लम्मा?
रूप-छवि ही कैसी उसदी
की हा नर्म कालजा
उस फौलादी नर-मर्दे दा-
सुनदे गै दुखिएं दे दुखड़े
की ओह धड़कन लगी पौंदा हा?"
आपूं बेदन बनी जंदा हा !
इस धरती दे दुक्खें कन्ने
तिल-तिल करियै की जलदा हा?
दूएं दी अग्गी इच कैहसी
कुद्दी-कुद्दी जाई पौंदा हा?
इस रिशते इच ब'न्नी लैंते-दर्दमंद तूं लोक नमाने।
× × ×
ओहदे कारण जगती दी अनजान बस्ती-
दुखिएं तै इन्साफ-न्यांऽ दा
बनी गेई इक राज-थड़ा ही।
ना-मेदी दे नेहरें अंदर ठेडे-ठोकर खा करदे हे-
उं'दे गित्तै जगती गै ए आशा दी इक जोत ही उसलै
× × ×
डुग्गर पर छाई ही उसलै
मौती दी बंगार डरौनी