केईं डंगदे ते चु'बदे न, केईं पर मैहकदे हासे,
मनै अपने दे साझै पर, सयाने परखदे हासे।।
अजें न्हेरे च सैहमे दे अनेकां प्राण बलमै दे,
जेहड़े हासें गी तरसै दे, जि'नेंगी तरसदे हासे।
कुतै कोई कदै सुनचै, गड़ाका सग्गोसारी दा,
मते मजबूरियें दे गै ए फिक्के सुनचदे हासे ।
मुकट दीएं दे मिट्टी दे बनेरें सोभदे इ'यां,
लचारी दे जि'यां ओठें प' आइयै झिजकदे हासे ।
असेंगी याद नेईं औन्दा, कढूं अस खु'ल्लियै हस्से,
सफर ऐसा ए औखा हा, नेईं हे बनकडे हासे ।
जि'नें ए बाग लाया हा, ओ माली लोक बिस्सरी गे,
नमें माली, नमें चर्चे, नचिन्ते सुनचदे हासे ।। ✧