ग़ज़ल-59

वक्त बी सिजदा करै उस मर्द मोमन गी सदा,
याद जिसदी धरती दी खुश्बू सुहानी होई गई।
इक जुआनी झक्खड़ै सांई चली, आई, गई,
इक जुआनी वक्त दी अक्खीं दा पानी होई गई।
लिखत कोई हुंदी नेईं मत्थै लिखी दी दोस्तो,
बे-समझ न्हेरें दी क्हानी, ओ परानी होई गई।
रूप-धन, जोवन कदै दिक्खी बड़ा भरमांदी ही,
परखदी करतूत हुन, अक्ख ए सयानी होई गई।
ज़िन्दगी दे बास्तै सूरज नमें नित्त लोड़दे,
चमक पिछले सूरजें दी इक्क क्हानी होई गई। ✧