गज़ल-61

पन्ता ने समझेआ ना मुल्लां दी समझ आया,
बदलोन्दे इस समें ने कीता ऐ के अशारा !
चिड़ियें ते हिरणें उप्पर इ'न्दा ऐ बस गुजारा,
इक बाज ऐ बचारा, इक शेर ऐ बचारा !
हर पासै सागरै दा वस्तार घूरै करदा,
किश्ती दी खैर, इसगी हर लैहर गै कनारा ।
फुल्लें चा निकलयै जो उड्डी गेई ऐ खुशबू,
अपनी गै लोथा अन्दर औन्दी निं पही दुबारा ।
ओठें चा गीत सुरके, ए गैं रमै ही आई,
इस मौके बेही गेआ ऐ, बता च कुं'न बचारा ?
ए भाख होर चुक्को, मेलो सुरें दी सरगम,
गीतें गी बलंगै करदा मंजल दा ओ नजारा ।। ✧