गज़ल-28

भारी गलानी की ऐ, की अक्ख ऐ भरी दी,
तूं अपनी छाती उप्पर, सिल कोई की धरी दी ?
जीवन ते 'कबला' ऐ, सरहिन्द दा किला ऐ,
किस्सा ऐ जुलमतें दा, ऐ कत्थ जाबरी दी।
लचारियें दे रस्ते न्हेरे मनुक्खता दे,
सरदी च परसो-परसा, गरमी च ए ठरी दी।
चलदी ऐ भाएं दुनिया, पर पेश किज निं चलदी,
हर हलचलै गी दिक्खै, ललचाई दी, डरी दी।
इक सोचदा छड़ा ऐ, महसूस किज निं करदा,
मसूस करदा जेहड़ा, उ'दी सोच मोई-मरी दी।
सूली टंगोई दी ऐ दुनिया च सोच सोहगी,
डोडी कमल दी जि'यां कंडें प' ए धरी दी,
यारें जो जन्म मारी, दोखी ने जो कटारी,
ओ बी ऐ में जरी दी, ए बी ऐ में जरी दी॥ $\diamond$