सूरज चढ़ै प' रोशनी स'बनें तै होऐ नेईं,
स'बनें दा हक्क होऐ पर, स'बनें गी धोऐ नईं।
न्हेरे च कैद, धुप्पें गी बस तरसदा ऐ मन,
हर पासै उच्चे कोट न, इक बी टपोऐ नईं।
हीखी झलाका दसदी ऐ, फही छपदी फिरदी ऐ,
जीवन बतूरड़े शा उ'दे पिच्छें नसोऐ नईं।
आखर सफर कटोन्दा ऐ, चलियै गै दोस्तो,
सोचें दै गास उड़ियै कुदरै पजोऐ नईं।
जीव्हा दी गल्ल चित्ता दी चूका च ब'न्नो नईं,
\#\# Page 114
कस्सो नेईं तां गंठ ए, आपूं कसोए नेईं ।
तेरे च जो ए 'दूआ' ऐ, तेरा बी यार नेईं,
दोखी ऐ, लड़दा स'बनें नै, इथै थम्होए नेईं।
नफरत करो उस गल्लै नै, जो गल्ल ठीक नेईं,
स'बनें गी चंगा आखियै, कोई चंगा होए नेईं।
ठाको इसी, ए नजरें चा तेरी जो झांकै दा,
अग्गी प' नंगे पैरें ते स'बनें चलोए नेईं।
किन्ना क्यास अपना ऐ, किन्ना-कू ढूंहगा ऐ ?
बैठे बठाए पैंछिया, ए भेत थ्वोए नेईं ॥