जि'नें रस्ते च साह् रोकी चलै करदी लुकाई ऐ,
उ'नें बिखड़ें करस्ते च, ए कुसने भाख लाई ऐ\!
बड़ा ऐ हौंसला इसदा, जां कोई ए सुदाई ऐ,
जो इस 'चोरें दी बस्ती' च, अलख इसने जगाई ऐ।
जिनेंगी सब पता हा चोरियें, चोरें ते साधे दा,
उ'नें गै ओंठ सी लैते, नजर नीमीं झुकाई ऐ।
सतारे ते बचारे हे, इ'नें' न्हेरे 'ने के लड़ना,
ब' कोई लड़ने गी आया ऐ, तां ऊशा मुस्कराई ऐ।
चलो चंगा होआ, भेती बी किज आइयै रली गे न,
असें सेही ऐ, उ'नें कोल्लै, कुसी सारत कराई ऐ\!
भरोसे दे किले अन्दर, कपट करदा ऐ रंगरलियां,
किले दे बाहर जनता दा बड़ा चौकस सपाही ऐ\!