अनगिनत भौड़ें च फसियै होई गेई किशती नढाल,
आदमी भीड़ें च बे-बस, उसदा बी बचना मुहाल।
मन नमाना हिखियें कोला चुरांदा नजर ऐ,
भर-सियालै भुल्ली जन्दे कमल-सर कमलें दा हाल।
रेत-कण मारू थलें इच, अपनी दुनिया इच्च मस्त,
ओ के जानन सैलतन के, के ऐ ब्हारें दा कमाल।
हुन पराए दुक्ख दिक्खी मन दना सं'गदा नेईं,
पर खुशी दूएं दी करदी कालजें गी नित्त घाल।
वक्त दी काया गी लकवा की होआ, कि'यां होआ ?
हर जगह बस लोक पुच्छै करदे बस इ'यै सवाल।
अस गुआची गे आं यारो, किज पता चलदा नेईं,
ना शकल पनछोंदी अपनी, ना गै हुन अपनी ए चाल ॥
\#\# Page 129