ग़ज़ल-86

मिलदे न हस्सी-हस्सियै सौ यार आदमी,
ल'बदा निं कोई तुप्पे दा गमखार आदमी।
आदर्श सिर पलिटियै, सेई रेह् दा रस्ते च,
सुरगै दे सुखने दिक्खै दा बेकार आदमी।
सारी खुदा दी सृश्टी दी सिरमौर रचना ऐ,
मंगें दा रस्ते भिक्ख की लचार आदमी।
सच, झूठ, ईन, आबरू, सब किश बिकै दा ऐ,
करदा ऐ कैहदा-कैहदा ए ब्यापार आदमी।
पी लेई शराब अपने तै परदा करी लेआ,
दूएं तै नंगा फिरदा ऐ हुश्यार आदमी।
विधि सिंह दे गीत गांदा ऐ, जित्तो गी पूजदा,
के-के तमाशे करदा ऐ ए कलाकार आदमी।
सोचें दे कैदखाने चा निकलै तां जा कुतांह।
उमरें दी कैद भोगै दा लचार आदमी। ✧