गज़ल-49

यारें गी मिलने-गिलने दी आदत नईं रेही।
फुल्लें गी आखो, खिड़ने दी आदत नईं रेही।
उड्डे दे रंग सूरतां, अक्खीं च सौ गिले,
परदे च किज बी रक्खने दी आदत नईं रेही।
मिलदा फरेब रस्ते च, बाह्मां खलारियै,
संगचोने, शर्म करने दी आदत नईं रेही।
गुस्ताखियां, हमाकतां, दीदा-दलेरियां,
पछताने, हत्थ मलने दी आदत नईं रेही।
जोबन खलारदा चलै रेशम, सुगन्ध रंग,
रूपै गी लाज स'लने दी आदत नईं रेही।
दीया कुतै बलै बी तां सेही होऐ ओपरा,
दीयें गी जि'यां बलने दी आदत नईं रेही।
सिद्धी जे बत्त होऐ तां मन अक्की-अक्की जा,
हुन सिद्धी बत्ता चलने दी आदत नईं रेही।
फैदे दी ऐ, भलाई दी, करेओ निं कोई गल्ल,
इत्थें कुसैगी सुनने दी आदत नईं रेही।
झुकदे न लोक हून बी, नाटक करन जि'यां,
चित्तें गी सिजदे करने दी आदत नईं रेही।। ✧