याद सफर आया ऐ पिछला, पर्दा जि'यां चकोन लगा,
राह रहांदू ऐ मन बी कैसा, पिछ्छें गी परतोन लगा।
खब्बल रूहानी होइयै दिक्खै, अम्बर लालोलाल होआ,
रुक्ख जि'यां कनसुआं लैंदे, फुल्लें पर कु'न रोन लगा ?
नीन्दर जेकर खु'ल्ली गई ऐ, करो निहालप न्हेरे च,
खातर तेरी भडूआ अद्धी रातीं भ्याग निं होन लगा।
गल्ल के होई, नैनें दे झरने चा सिमकन नीर लगा,
अन्दर कल्ला मन बैठे दा, केहड़े टल्ले धोन लगा।
न्हेरे नेईं, नेरी ऐ, इस्दें झक्खड़ कन्ने चलदा ऐ,
बदल बऱ्हाऊ आनने इस्सैं, तां ए जाड़ पसोन लगा ?
अफ्फल बुटें थाहर हे मल्ने, माली ने किज छिम्बे न,
बाग बची'आ, खुश हो भडूआ, तूं कैसी भलखोन लगा ?
इस बदली ने दिक्खो कैसी, खेड मचाई गासा पर,
धुप्प बचैरी बलगै करदी, सूरज बी संगचोन लगा ॥ ✧