गज़ल-34

गल्लें दे रसिया लोक न, इ'न्दा के चारना,
चारागरें दी अज्ज बी, बदली निं धारना।
केईं पूर डोबी बैठे ए, फही बी भलोके लोक,
इ'न्दै भरोसै बैठे दे, "इ'नैं गै तारना"।
मौसम बदलदे हैन पर, कोई रास आवै बी,
कोई साड्डा, कोई सेड्डा, कुसै ने ठारना।
झूठै दी गल्ल करदे ओ, फही ओठ टुकदे ओ,
हुनरी मरहक्खा ए तुसें पौना तुआरना।
ए बी चले न स्हालने गी अग्ग, रहान लोक,
सांझी ऐ कन्थ, मिलदा ए उ'न्दे 'नै सारना।
हवसै दे हत्थ बधदे न, खिड़दे जदूं न फुल्ल,
रूपै गी पर सुदाऽ जे ऐ, झलकारै मारना।
न्हेरे च सौदे करदे न, लोई च राम-राम,
पुछदे न- बर्त रक्खेदा, कि'यां पुआरना ? ✧