गर्दशें चा निकलने दा कोई रस्ता होना ऐ।
काफले सहराऽ च न तां कोई चश्मा होना ऐ॥
बे-मैहरमी दे न्हेरें अन्दर, मन-मसाफर इक्कला,
लगन दा, नज़रें च उसदी, कोई दीया होना ऐ।
"जिंदगी दे चश्मे पर, दोऐ हे अस, जां फुल्ल हे",
व्हाऽ पुरे दी बोल्ली बैठी- कोई सुखना होना ऐ।
दोस्ती दे किन्ने डाऽवे! होई नेईं पन्छान पर,
दौन्नें चित्तें दे मंझाटै कोई पर्दा होना ऐ।
डूंहगे डडलें बगदा दरेआ, प्यासा रक्खै जीवें गी,
मेरे अंदर बी तां ऐसा कोई दरेआ होना ऐ।
ए खुशी दे पर्व ते चेहरें प रौनक कोई नेईं,
चित्तें अंदर दर्द इ'दै कोई पलदा होना ऐ।
रेखा गरीबी हेठ अनगिन लोक प्यासे बलगदे,
तेरे मै-खाने च साकी, कोई फितना होना ऐ। ✧
**गज़ल-19**
घेरे दा ऐ मतें मगर, घेरे च कोई नेईं,
तेरे सवाए ओ मना, तेरे च कोई नेईं।
गैरत, तलाश, हक्कै दी ईन, सच,
मरदें च होंदे गुण केई, मुर्दें च कोई नेईं।
मालां च मस्त कोई हा, तस्वीह च कोई हा,
सब ओपरेपनै च हे, अपने च कोई नेईं।
कोई हा खब्बी बख्खिया, सज्जी च कोई हा,
रस्ते दे आर-पार हे, रस्ते च कोई नेईं।
भागें दे लेख काश तूं अपने पढ़ी सकें।
हत्थें च तेरे हैन पर मत्थे च कोई नेईं।
पागल मलंग रस्ते च, भीड़ै गी दिक्खियै,
आखन लगा- "सब नंगे न, परदे च कोई नेईं॥" ✧
**गज़ल-20**
ओह स'बनें नै सांझां नभांदा नेईं ऐ,
जो मंदे गी चंगा गलांदा नेईं ऐ।
सिदक दा तरान्ना, सचाई दा नगमा,
जमान्ने दी महफ़ल गी भांदा नेईं ऐ।
मशीनी ऐ संगीत गलियें बाजारें,
मनै दा कोई गीत गांदा नेईं ऐ।
इ'नें कोठियें इच दौलत बड़ी ऐ,
ब, चिड़ियें गी कोई चुग पांदा नेईं ऐ।
साहें च इ'यां समाए न रौले,
खामोशी दा कोई गीत भांदा नेईं ऐ। ✧