गज़ल-38

गरम लूऐं दा ओ चलना, फिरी बदलें दा ए ब'रना,
प्रलै बनदा ऐ निरदोसें दा, आहू भरना, जबर जरना।
मेरे बागै दे ए बूटे, पले गरमी ते धुप्पें च,
इ'नें सरदी शा की संग'ना, इ'नें पतझड़ 'शा की डरना ?
कदें हिरखी फुहारां न, कदें हुंकार बिजली दी,
कवि दी कल्पना-बदली! बड़ा नोखा तेरा ब'रना।
'ए अमरत ऐ, जां मोहरा ऐ'--भरम हिरखै दा जिसगी ऐ,
उ'दी समझा गी के आखां, नेही समझा गी के करना ?
जो इस प्रीतै दी गंगा च नेईं, डुब्बे, ओ डुब्बी गे,
जो डुब्बी गे-तरी गे ओ; बस ए जीना ते ए मरना।
समां चोरें दा, ठग्गी दा, बुरी, मैली कनीतें दा,
मसीतें-मन्दरें अन्दर बड़ा मुश्कल ऐ तिल धरना ॥ ✧