जड़े जौहर ध्वोए ओ चुप-चाप पी ले, जदू सूल चु'ब्बे तदू मुसकराया,
बड़ी डंगदी यारें गी चुप्पी ए मेरी; में यारें दी यारी प' पर्दा हा पाया ।
परोन्दा रहा हार जिन्दे लेई में, उ'नें कैसी नजरां चुराइयां मेरे शा,
मजूरी दी हीखी कढू में ही कीती, में अपने गै हिरखै दा रिण हा चुकाया ।
चुनी-चुनियै तीले हा घर जिस बनाया,
ते कण-कण खिलाइयै हे बोट अपने पाले,
देआ दा हा कां उस चिड़ी गी ए लाह्मां,
"तुगी मोइये, दुनिया च जीना निं आया" ।
जड़ी सिप्प मोती बनान्दी ऐ साथी, बड़े डूंहगे पानी च बन्दी कुतै ओ,
तू रेत चा चुनियै इ'नें सिप्पियें गी, ठगणा कुसी हा, तूं आपा ठगाया।
मिगी जलाने गी तूं दोखी दे बागा, चुनी फुल्ल-कलियां हा शिंगार कीता,
तुगी दोखियें बी पछांता निं जेल्लै, तां में बेबसी पर तेरी मुस्कराया।
इ'नें सरल लोकें दी बस्ती च आइयै,
तूं बेचै 'नां बनजारेआ, कच्च कच्ची,
नजर जिन्दी पर सुच्चे मोती नछावर,
उ'नेंगी तूं कच्छू दा बन्दी बनाया॥ ✧