ग़ज़ल-13

वक्त ने के-के अजें दुर्गत बनानी ऐ तेरी,
गल्ल मेरी समझी लै तां- मेहरबानी ऐ तेरी।
इश्क गै जिसगी नेईं, कोई दर्द गै जिसगी नेईं,
वक्त हस्सै करदा ऐ- कैसी जुआनी ऐ तेरी!
वक्त हा, इतिहास हा तेरी कसीदा खानियां,
हुन असें असली हकीकत बी सुनानी ऐ तेरी।
अपने सस्ते नाएं पर थाहरें गी नेईं मन्सूब कर,
भुक्ख सस्ती शोहरतें दी हासोआनी ऐ तेरी।
फुल्ल ज़ख्मी, रुक्ख, बेलां, सैलतन की सब उदास ?
बाग तेरा, फुल्ल तेरे, बागबानी ऐ तेरी।
मस्तियां वैहदत दियां, जां खूने-नाहक दा नशा ?
ए निशानी ऐ तेरी, जां ओ निशानी ऐ तेरी ?
लैहर बन, खुशबूआं बन, ठंडी हवा दा झोंका बन,
सब करिश्मे करने आली ए जुआनी ऐ तेरी। ✧