ग़ज़ल-11

ज़िन्दगी दी किश्ती अपनी म्हेश इक हलचल च ऐ।
मेरे सफ़रै दा कनारा, नेईं कुसै मंज़ल च ऐ।
प्यार, नफ़रत, हसद किन्ना आदमी दे दिल च ऐ।
फ़सल इक छप्पी दी जिया' इक नकारे तिल च ऐ।
अस फुहारां दिक्खियै बदली दे आशक होए हे,
के पता हा बिज्ज बी छप्पी इ'दी बुक्कल च ऐ।
बिजलियें दे तेज मलकारें दा बी मैहरम ऐ दिल,
पर इसी भान्दी चमक, तारें दी जो झिलमिल च ऐ।
की मिगी फुल्लें च, चन्नै च नज़र औन्दा ऐ ओह,
नज़र औन्दा जलवा उ'थै, जो कुसै दे दिल च ऐ।
इक तेरी नज़रें दा मौसम, इक मेरी नज़रें दा ऐ,
ब्वार बी, पतझड़ बी किट्ठी अज्ज तेरी महफ़ल च ऐ।
मस्त अपनी गर्दशें पर, मन बड़ा मस्ताना ऐ,
एह कदैं बागें च ऐ, एह कदैं जंगल च ऐ॥ ✧