गज़ल-107

बिन बोल्ले समझोइयां गल्लां,
कीतियां नेईं पर होइयां गल्लां ।
सच्चो-सच्च जे होइयां गल्लां,
तत्ते डार बझोइयां गल्लां ।
मनै च जेल्लै मैल होई तां,
गु'जल पे पलचोइयां गल्लां ।
मन हस्से तां हस्सी पेइयां,
मन रोए तां रोइयां गल्लां ।
असली गल्ल ते नज़रें कीती,
बाकी रस्मी होइयां गल्लां ।
सज्जै-खब्बै नज़ारां पुच्छन,
इन्ने चिर के होइयां गल्लां ?
हिरखी मौसम चेतै आए,
सूहे रंग रंगोइयां गल्लां ।
इक हासे दे मुल्लें बिकियां,
उमरें तैं भरमोइयां गल्लां ।। ✧