गज़ल-103

रस्ते दा थौह कोई नेईं, मंज़ल दा पता नेईं,
अन-गिनत भीड़ ल'बदी ऐ, माह्नू ते दुसदा नेईं।
खंडर किलें दे मैहलें दे, इक मिसरा गांदे न,
दुनिया च चलदी हाकमी, कोई सदा नेईं।
कागज दे फुल्लें-कलियें दे शंगार मंदरें!
ठगदा ऐ देवतें गी बी, माह्नू ए डरदा नेईं।
जीवन दी बत्ता केईं बारी ऐसा बी होंदा ऐ,
मंज़ल कुतांह, रस्ता कुताह किश बी पता नेईं।
इक जैहर ना-बरोबरी, फैले दा हर तरफ,
भीड़ें गी दिक्खो सेही होऐ, किश बी होआ नेईं।
अन-गिनत धरम, फिरके न, अन-गिनत रस्ते न,
इन्सानियत दे नुक्ते तक कोई बी पुजदा नेईं। ✧